ନୂଆଦିଲ୍ଲୀ: ମଧ୍ୟାପ୍ରାଚ୍ୟରେ ଯୁଦ୍ଧ। ମାତ୍ର ତା’ର କୁପ୍ରଭାବ ଭୋଗୁଛି ଭାରତ। ଇରାନ ଓ ଇସ୍ରାଏଲ-ଆମେରିକା ଯୁଦ୍ଧ କାରଣରୁ ଜେଟ୍ ଇନ୍ଧନ ମୂଲ୍ୟ ବୃଦ୍ଧି ପାଇବାକୁ ଯାଉଛି। ଏୟାର ଇଣ୍ଡିଆ ତା’ର ଘରୋଇ ଏବଂ ଅନ୍ତର୍ଜାତୀୟ ନେଟୱାର୍କରେ ଇନ୍ଧନ ସରଚାର୍ଜରେ ପର୍ଯ୍ୟାୟ କ୍ରମେ ବୃଦ୍ଧି କରିବ ବୋଲି ଘୋଷଣା କରିଛି।
କମ୍ପାନୀ ମୁଖ୍ୟତଃ ତିନୋଟି ପର୍ଯ୍ୟାୟରେ ବର୍ଦ୍ଧିତ ଭଡ଼ା ଲାଗୁ କରିବାକୁ ଦର ସ୍ଲାବ୍ ଦେଇଛି। କମ୍ପାନୀ କହିଛି, ଏହି ପଦକ୍ଷେପ ପାଇଁ ଦୁଃଖ ପ୍ରକାଶ କରୁଛୁ। ଦରବୃଦ୍ଧିକୁ ଅନିବାର୍ଯ୍ୟ ବର୍ଣ୍ଣନା କରିବା ସହ ଏଥିପାଇଁ ନିୟନ୍ତ୍ରଣ ବାହାରେ ଥିବା କାରଣଗୁଡ଼ିକୁ ଦାୟୀ କରିଛି।
ଏୟାର ଇଣ୍ଡିଆ କହିଛି ଯେ ସରଚାର୍ଜ ସଂଶୋଧନ ବିନା କିଛି ବିମାନ ବାଣିଜ୍ୟିକ ଭାବରେ ବାତିଲ ହେବାର ସମ୍ଭାବନା ରହିଛି। ଏପରି ଇନ୍ଧନ ସରଚାର୍ଜ ଅନୁପସ୍ଥିତିରେ କିଛି ବିମାନ ପରିଚାଳନା ଖର୍ଚ୍ଚ ପୂରଣ କରିପାରିବ ନାହିଁ ଏବଂ ଏହାକୁ ବାତିଲ କରିବାକୁ ପଡିବ ବୋଲି କମ୍ପାନୀ କହିଛି।
ମଧ୍ୟପ୍ରାଚ୍ୟରେ ଇରାନ-ଆମେରିକା ଯୁଦ୍ଧ ମଧ୍ୟ ସାରା ବିଶ୍ୱରେ ପ୍ରାକୃତିକ ଗ୍ୟାସ ଯୋଗାଣକୁ ପ୍ରଭାବିତ କରିଛି। ହରମୁଜ୍ ପ୍ରଣାଳୀ ଦୁଇ ସପ୍ତାହରୁ ଅଧିକ ସମୟ ଧରି ୭୫୦ରୁ ଅଧିକ ମାଲବାହୀ ଜାହାଜ ପ୍ରମୁଖ ବନ୍ଦରଗୁଡ଼ିକରେ ଫସି ରହିଛି।
ଭାରତ ଏହାର ପ୍ରାକୃତିକ ଗ୍ୟାସ ଆବଶ୍ୟକତାର ୫୦ ପ୍ରତିଶତ ଅନ୍ତର୍ଜାତୀୟ ବଜାରରୁ କିଣେ। ଏଥିମଧ୍ୟରୁ କାତାରରୁ କେବଳ ୨୦ ପ୍ରତିଶତ ଆମଦାନୀ କରେ। କତାରର ଗ୍ୟାସ କ୍ଷେତ୍ର ଉପରେ ଇରାନର କ୍ଷେପଣାସ୍ତ୍ର ଆକ୍ରମଣ ପରେ ବିଶ୍ୱର ସର୍ବବୃହତ ପ୍ରାକୃତିକ ଗ୍ୟାସ ରପ୍ତାନିକାରୀ କମ୍ପାନୀ କତାରଏନର୍ଜି ଉତ୍ପାଦନ ବନ୍ଦ କରିଦେଇଛି। ଯାହାଯୋଗୁ ଏସୀୟ ଅଂଚଳଗୁଡ଼ିକୁ ପ୍ରାକୃତିକ ଗ୍ୟାସ ଯୋଗାଣ ପ୍ରଭାବିତ କରିଛି। ଏହି ବର୍ଦ୍ଧିତ ଚ୍ୟାଲେଞ୍ଜର ମୁକାବିଲା କରିବା ପାଇଁ, ଭାରତରେ ସାରା ଦେଶରେ ବିଭିନ୍ନ କ୍ଷେତ୍ରରେ ପ୍ରାକୃତିକ ଗ୍ୟାସ ଯୋଗାଣ ଏବଂ ବ୍ୟବହାରକୁ ନିୟନ୍ତ୍ରଣ କରିବା ପାଇଁ ନିର୍ଦ୍ଦେଶାବଳୀ ରହିଛି।