‘ସୁଟ୍ ଆଉଟ୍ ଆଟ୍ ଲୋଖଣ୍ଡୱାଲା’, ‘ଜଂଜିର’, ‘ହସିନା ପାର୍କର’ ନିର୍ମାତା ଅପୂର୍ବ ଲାଖିଆ ନିକଟରେ ଏକ ସାକ୍ଷାତ ଆଲୋଚନାରେ ଭାଗ ନେଇ କୁଖ୍ୟାତ ଗ୍ୟାଙ୍ଗଷ୍ଟର ଦାଉଦ୍ ଇବ୍ରାହିମର ଭଉଣୀ ହସିନା ପାର୍କରଙ୍କ ସହିତ ତାଙ୍କର ପ୍ରଥମ ସାକ୍ଷାତ ମନେ ପକାଇଥିଲେ ।
ମହିଳା ଗ୍ୟାଙ୍ଗଷ୍ଟର ହସିନାଙ୍କ ଆଖିର ଈଶାରା ଓ ସାଙ୍କେତିକ କଥାକୁ ତାଙ୍କର ଅନୁଚରମାନେ ନିରବରେ ପାଳନ କରୁଥିଲେ ଯାହା ଅପୂର୍ବଙ୍କୁ ପ୍ରଭାବିତ କରୁଥିଲା । ପରଦା ଆଢୁଆଳରେ ରହି ଦୁର୍ଦ୍ଦାନ୍ତ ଅନ୍ଧାରୀ ମୁଲକକୁ ସମ୍ଭାଳିବା ହସିନା ପାର୍କରଙ୍କ ଭଳି ଦୃଢ଼ମନା ମହିଳା ହିଁ କରିପାରନ୍ତି ବୋଲି ଅପୂର୍ବଙ୍କ ହୃଦବୋଧ ହୋଇଥିଲା ।
ହସିନାଙ୍କର ବ୍ୟକ୍ତିତ୍ୱ ପ୍ରତି ଖୁବ୍ ପ୍ରଭାବିତ ହୋଇ ଯାଇଥିଲେ ଅପୂର୍ବ । ହସିନାଙ୍କ ମୁହଁର ତେଜ ନିକଟରେ ପ୍ରତିପକ୍ଷ ନଇଁବାକୁ ବାଧ୍ୟ ହେଉଥିଲେ ।
ଅପୂର୍ବ କହନ୍ତି, ସମୀର ନାମକ ଜଣେ ଯୁବକ (ଦାଉଦ୍ର ଦୂର ସଂପର୍କୀୟ) ତାଙ୍କୁ ଭେଟି ଦାଉଦ୍ ଉପରେ ଏକ ଚଳଚ୍ଚିତ୍ର ନିର୍ମାଣ କରିବାକୁ ପ୍ରସ୍ତାବ ଦେଇଥିଲା । ବହୁ ଗ୍ୟାଙ୍ଗଷ୍ଟରଙ୍କ ଉପରେ ଚଳଚ୍ଚିତ୍ର ନିର୍ମାଣ କରିଥିବା ଅପୂର୍ବ ସମୀରଙ୍କ ପ୍ରସ୍ତାବକୁ ସଂପୂର୍ଣ୍ଣ ଏଡାଇ ଦେଇ ନଥିଲେ । ଆଲୋଚନା ଛଳରେ ଅପୂର୍ବ ଗ୍ୟାଙ୍ଗଷ୍ଟର ଦାଉଦ୍ ଓ ହସିନା ମଧ୍ୟରେ ଥିବା ସଂପର୍କକୁ ଗମ୍ଭୀରତାର ସହ ଅନୁଧ୍ୟାନ କରିଥିଲେ । ସବୁକିଛି ଶୁଣିବା ପରେ ସେ ଦାଉଦ୍ ବଦଳରେ ହସିନାଙ୍କ ସଂଘର୍ଷଭରା ଜୀବନୀକୁ କେନ୍ଦ୍ର କରି ଚଳଚ୍ଚିତ୍ର ନିର୍ମାଣ କରିବାକୁ ଆଗ୍ରହ ପ୍ରକାଶ କରିଥିଲେ ।
ହସିନାଙ୍କ ଉପରେ ଚଳଚ୍ଚିତ୍ର ନିର୍ମାଣ କରିବା ପୂର୍ବରୁ ଅନ୍ତତଃପକ୍ଷେ ତାଙ୍କୁ ଥରେ ସାକ୍ଷାତ କରିବା ଜରୁରୀ ବୋଲି ଅପୂର୍ବ ଅନୁଭବ କରିଥିଲେ । ମାତ୍ର ହସିନାଙ୍କ ସହ କିପରି ଓ କୋଉଠି
ଭେଟିବା ଉଚିତ ହେବ, ସେ ସଂପର୍କରେ କିଛି ସ୍ଥିର କରିପାରିଲେନି ।
ହସିନାଙ୍କୁ ଭେଟିବା ପାଇଁ ଆଗ୍ରହୀ ଥିଲେ ମଧ୍ୟ ମନେମନେ ଡରୁଥିଲେ ଅପୂର୍ବ । ଗ୍ୟାଙ୍ଗଷ୍ଟରଙ୍କ ମୁଣ୍ଡ, ଟିକିଏ ଟିକିଏ କଥାରେ ବନ୍ଧୁକ ଚଲାଇବାର ଝୁଙ୍କ ।
ମାଲାଡର କୌଣସି ଏକ ଅଜଣା ସ୍ଥାନରେ ହସିନାଙ୍କୁ ଭେଟିବା କାର୍ଯ୍ୟକ୍ରମ ସ୍ଥିର କରାଯାଇଥିଲା ରାତି ପ୍ରାୟ ସାଢେ଼ ୮ଟାରେ । ଠିକଣା ସମୟରେ ମାଲାଡ ଅଂଚଳର ଜନଗହଳିପୂର୍ଣ୍ଣ ସଡ଼କରେ ଅପୂର୍ବଙ୍କ ଗାଡ଼ିକୁ ଠଉରାଇ ପାରିଥିଲେ ହସିନାଙ୍କ ଅନୁଚର ।
ଆଖି ପିଛୁଳାକେ ଟ୍ରାଫିକ୍ ଜାମ୍ ହଟାଇ ଦିଆଗଲା ଖାସ୍ କରି ଅପୂର୍ବଙ୍କ ଗାଡ଼ି ପାଇଁ । ଅପୂର୍ବଙ୍କୁ ସାଙ୍ଗରେ ଧରି ବାଟ କଢ଼ାଇ ଚାଲିଥିଲା ସମୀର । ଠିକଣା ଜାଗାକୁ ହସିନା ଆସିଲେ, ମାତ୍ର ଦୁଇଘଂଟା ବିଳମ୍ବରେ । ତା’ର କାରଣ ବଡ଼ ବିଚିତ୍ର । ହସିନାଙ୍କୁ ଦୁଇଘଂଟା ଅପେକ୍ଷା କରାଇ ଥିବାରୁ ଅପୂର୍ବଙ୍କୁ ତା’ର ପରିଣାମ ଭୋଗିବାକୁ ପଡ଼ିଲା ।
ହସିନା ପାର୍କର’ ଚଳଚ୍ଚିତ୍ରଟି ଶୁଭମୁକ୍ତି ଲାଭ କରିଥିଲା । ମାତ୍ର ଖୋଦ୍ ହସିନା ଉକ୍ତ ଚଳଚ୍ଚିତ୍ରଟିକୁ ଦେଖି ପାରିଲେନି । ଚଳଚ୍ଚିତ୍ରଟି ମୁକ୍ତିଲାଭ କରିବା ପୂର୍ବରୁ ହସିନା ଇହଧାମରୁ ବିଦାୟ ନେଇଥିଲେ ।
ଶ୍ରଦ୍ଧା କପୁରଙ୍କ ଅଭିନୀତ ଚଳଚ୍ଚିତ୍ରଟି ବକ୍ସ ଅଫିସରେ ସଫଳ ହୋଇ ନଥିଲା । ନିର୍ଦ୍ଦେଶକ ଅପୂର୍ବ ଲାଖିଆ ଉକ୍ତ ଚଳଚ୍ଚିତ୍ର ନିର୍ମାଣ ବାବଦକୁ ଚୁକ୍ତି ମୁତାବକ ପାରିଶ୍ରମିକ ପାଇ ନଥିଲେ ।
ଚଳଚ୍ଚିତ୍ରଟିକୁ ନିର୍ମାଣ କରିବା ନିଷ୍ପତି ଠିକ ନଥିଲା ବୋଲି କହିଥିଲେ ଅପୂର୍ବ । ତାଙ୍କ ମତରେ ଚଳଚ୍ଚିତ୍ରଟି ବିଦେଶରେ ମୁକ୍ତିଲାଭ କରି ପାରିଲାନି । ଚଳଚ୍ଚିତ୍ରଟି ମୁକ୍ତିଲାଭ କରିବାର କିଛିଦିନ ଭିତରେ ତା’ର ପ୍ରଯୋଜକଙ୍କ ନିଧନ ଘଟିଥିଲା ।