ନୂଆଦିଲ୍ଲୀ: ଭାରତୀୟ ରେଳବାଇ ନିଶ୍ଚିତ ଟିକେଟ ପାଇଁ ବାତିଲକରଣ ନିୟମରେ ଗୁରୁତ୍ୱପୂର୍ଣ୍ଣ ପରିବର୍ତନ କରିଛି। ନୂତନ ନିୟମ ଅନୁଯାୟୀ, ରିଫଣ୍ଡ ଏବଂ ଜରିମାନା ଏବେ ଟ୍ରେନ୍ ଛାଡିବାର କେତେ ସମୟ ପୂର୍ବରୁ ଯାତ୍ରୀ ଟିକେଟ ବାତିଲ କରୁଛନ୍ତି ତାହା ଉପରେ ନିର୍ଭର କରିବ। ଏହା ପ୍ରକ୍ରିୟାକୁ ସରଳ କରିବା ଏବଂ ସିଷ୍ଟମ ଅପବ୍ୟବହାରକୁ ରୋକିବା ପାଇଁ ଉଦ୍ଦିଷ୍ଟ।
ନୂତନ ନିୟମ ଅନୁଯାୟୀ, ଯଦି ଜଣେ ଯାତ୍ରୀ ଟ୍ରେନ୍ ଛାଡ଼ିବାର ୭୨ ଘଂଟା ପୂର୍ବରୁ ତାଙ୍କ ଟିକେଟ୍ ବାତିଲ କରନ୍ତି, ତେବେ ସେ ପ୍ରଯୁଜ୍ୟ ବାତିଲ୍ ଶୁଳ୍କ ବାଦ ଦେଇ ୭୫% ପର୍ଯ୍ୟନ୍ତ ଟଙ୍କା ଫେରସ୍ତ ପାଇପାରିବେ। ୭୨ ରୁ ୨୪ ଘଂଟା ଭିତରେ ବାତିଲ୍ କଲେ ୨୫% ଟଙ୍କା ଫେରସ୍ତ ମିଳିବ। ୨୪ ରୁ ୮ ଘଂଟା ମଧ୍ୟରେ ବାତିଲ୍ କଲେ ୫୦% ଟଙ୍କା ଫେରସ୍ତ ମିଳିବ। ୮ ଘଂଟାରୁ କମ୍ ସମୟ ପୂର୍ବରୁ ବାତିଲ୍ କଲେ ଟଙ୍କା ଫେରସ୍ତ ମିଳିବ ନାହିଁ।
ଯାତ୍ରୀମାନଙ୍କୁ ଆଶ୍ୱସ୍ତି ଦେବା ପାଇଁ, ରେଳବାଇ ବୋର୍ଡିଂ ଷ୍ଟେସନ ପରିବର୍ତନ କରିବା ପାଇଁ ନିୟମରେ ମଧ୍ୟ ସଂଶୋଧନ କରିଛି। ଯାତ୍ରୀମାନେ ଏବେ ନିର୍ଦ୍ଧାରିତ ପ୍ରସ୍ଥାନ ସମୟର ୩୦ ମିନିଟ୍ ପୂର୍ବରୁ ସେମାନଙ୍କର ବୋର୍ଡିଂ ପଏଂଟ ପରିବର୍ତନ କରିପାରିବେ। ଏହି ବୈଶିଷ୍ଟ୍ୟ ବିଶେଷ ଭାବରେ ଏକାଧିକ ରେଳଷ୍ଟେସନ ଥିବା ବଡ଼ ସହରରେ ରହୁଥିବା ଯାତ୍ରୀମାନଙ୍କ ପାଇଁ ଉପଯୋଗୀ ହେବ।
ପୂର୍ବରୁ, ବୋର୍ଡିଂ ଷ୍ଟେସନ ପରିବର୍ତନ କରିବାର ସୁବିଧା କେବଳ ଚାର୍ଟ ପ୍ରସ୍ତୁତି ଅବଧି ପର୍ଯ୍ୟନ୍ତ ଉପଲବ୍ଧ ଥିଲା। ନୂତନ ନିୟମ ଲାଗୁ ହେବା ସହିତ, ଯାତ୍ରୀମାନେ ଏବେ ଶେଷ ମୁହୂର୍ତ ପର୍ଯ୍ୟନ୍ତ ଏହି ସୁବିଧା ପାଇପାରିବେ, ଯାହା ଯାତ୍ରାକୁ ଅଧିକ ସୁବିଧାଜନକ କରିବ।
ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ଅନୁଯାୟୀ , ଏହି ପରିବର୍ତନ ଟିକେଟ୍ ବ୍ୟବସାୟ କରୁଥିବା ଦଲାଲଙ୍କୁ ରୋକିବା ପାଇଁ ମଧ୍ୟ ଉଦ୍ଦିଷ୍ଟ। ପୂର୍ବରୁ, ଅନେକ ବ୍ୟବସାୟୀ ବହୁ ସଂଖ୍ୟକ ଟିକେଟ୍ ବୁକ୍ କରୁଥିଲେ ଏବଂ ପରେ ସେଗୁଡ଼ିକୁ ବାତିଲ କରୁଥିଲେ। ରିଫଣ୍ଡ ପାଇ ଲାଭ ପାଉଥିଲେ। ନୂତନ ନିୟମ ଏପରି କାର୍ଯ୍ୟକଳାପ ଉପରେ ରୋକ ଲଗାଇବ। ଏହି ପରିବର୍ତନ ଯାତ୍ରୀଙ୍କୁ ଅଧିକ ସୁବିଧା ପ୍ରଦାନ କରିବ। ଟିକେଟ୍ ବୁକିଂରେ ସ୍ୱଚ୍ଛତା ରହିବ।