ଅହମଦାବାଦ: ଦେଶରେ ପ୍ରଥମଥର ହେଲା ସି-ପ୍ଲେନ୍ ସେବାର ଆରମ୍ଭ। କେଓ୍ୱଡ଼ିଆ-ସାବରମତି ରିଭରଫ୍ରଣ୍ଟ ସି-ପ୍ଲେନ୍ ସେବାର ଶୁଭାରମ୍ଭ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଲୌହମାନବ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ଜୟନ୍ତି ଅବସରରେ ପ୍ରଧାନମନ୍ତ୍ରୀ ଏହାର ଉଦଘାଟନ କରିଛନ୍ତି।
ତେବେ ପର୍ଯ୍ୟଟକଙ୍କ ପାଇଁ ପ୍ରତ୍ୟହ ଅହମଦାବାଦରୁ କେଓ୍ୱାଡ଼ିଆ ଏବଂ କେଓ୍ୱାଡ଼ିଆରୁ ଅହମଦାବାଦ ଏହି ସେବା ଉପଲବ୍ଧ ରହିବ। ଉଦଘାଟନୀ ଉତ୍ସବ ଅବସରରେ ମୋଦି ନିଜେ ମଧ୍ୟ ସି-ପ୍ଲେନରେ ଯାତ୍ରା କରିଛନ୍ତି। ଏହାପୂର୍ବରୁ କେଓ୍ୱାଡ଼ିଆସ୍ଥିତ ଏକତା କ୍ରୁଜ୍ ମଧ୍ୟ ମୋଦି ଉଦଘାଟନ କରିଛନ୍ତି। ସାବରମତି ରିଭରଫ୍ରଣ୍ଟରୁ କେଓ୍ୱାଡ଼ିଆସ୍ଥିତ ଷ୍ଟାଚ୍ୟୁ ଅଫ୍ ୟୁନିଟି ପର୍ଯ୍ୟନ୍ତ ଏହି ସି-ପ୍ଲେନ୍ ସେବା ଆରମ୍ଭ କରାଯାଇଛି।
ସୂଚନାଯୋଗ୍ୟ, ଗୁଜରାଟ ନର୍ମଦା ଜିଲ୍ଲା କେଓ୍ୱାଡ଼ଇାରୁ ଅହମଦାବାଦର ଷ୍ଟାଚ୍ଯୁ ଅଫ୍ ୟୁନିଟି ଯାଏ ପ୍ରଥମ ଉଡ଼ାଣ ଭରିଥିଲା ସି-ପ୍ଲେନ୍। ଏହା ମୋଦିଙ୍କ ଡ୍ରିମ ପ୍ରୋଜେକ୍ଟଗୁଡ଼ିକ ମଧ୍ୟରୁ ଅନ୍ୟତମ ହେଉଛି ସି-ପ୍ଲେନ୍ ପ୍ରୋଜେକ୍ଟ, ଯାହାକୁ ଏବେ ଷ୍ଟାଚ୍ୟୁ ଅଫ୍ ୟୁନିଟି ସହ ଯୋଡ଼ାଯାଇଛି। ଆସନ୍ତାକାଲିଠାରୁ ସି-ପ୍ଲେନ୍ ଆନୁଷ୍ଠାନିକ ଭାବେ ଚାଲିବ। ଉଡ଼ାଣ ଯୋଜନା ସହିତ ପର୍ଯ୍ୟଟନ କ୍ଷେତ୍ରରେ ଏହା ବେଶ୍ ସହାୟକ ହେବ ବୋଲି ଆଶା କରାଯାଉଛି।