ନୂଆଦିଲ୍ଲୀ: ଦେଶରେ ଗ୍ୟାସ ଯୋଗାଣକୁ ସୁବ୍ୟବସ୍ଥିତ କରିବା ପାଇଁ କେନ୍ଦ୍ର ସରକାର ଏକ ବଡ଼ ପଦକ୍ଷେପ ନେଇଛନ୍ତି। ବ୍ୟବସାୟିକ LPG ସିଲିଣ୍ଡର ବଦଳରେ ଏବେ ‘ପାଇପ୍ଡ ନ୍ୟାଚୁରାଲ ଗ୍ୟାସ’ ବା PNG ବ୍ୟବହାର କରିବାକୁ ଗ୍ରାହକମାନଙ୍କୁ ପରାମର୍ଶ ଦିଆଯାଇଛି। କେବଳ ସେତିକି ନୁହେଁ, ନୂଆ PNG ସଂଯୋଗ ନେଲେ ଗ୍ରାହକଙ୍କୁ ମିଳିବ ଆକର୍ଷଣୀୟ ରିହାତି ଓ କ୍ୟାସବ୍ୟାକ୍।
ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ ମନ୍ତ୍ରଣାଳୟର ଯୁଗ୍ମ ସଚିବ ସୁଜାତା ଶର୍ମାଙ୍କ ସୂଚନା ଅନୁସାରେ, ଯେଉଁ ଅଂଚଳରେ ପାଇପ୍ ଲାଇନର ଭିତିଭୂମି ରହିଛି, ସେଠାରେ ବ୍ୟବସାୟିକ ପ୍ରତିଷ୍ଠାନଗୁଡ଼ିକ ତୁରନ୍ତ PNG ସଂଯୋଗ ନେବା ଉଚିତ। ଏହାଦ୍ୱାରା ଖଚଏ ସିଲିଣ୍ଡର ଉପରେ ରହୁଥିବା ଅତିରିକ୍ତ ଚାପ କମିବ ଏବଂ ସମଗ୍ର ଦେଶରେ ଇନ୍ଧନର ଉପଲବ୍ଧତା ସ୍ଥିର ରହିବ।
ଗ୍ରାହକଙ୍କୁ PNG ପ୍ରତି ଆକୃଷ୍ଟ କରିବା ପାଇଁ ବିଭିନ୍ନ ଗ୍ୟାସ କମ୍ପାନୀ ନିମ୍ନଲିଖିତ ରିହାତି ଘୋଷଣା କରିଛନ୍ତି। ଇନ୍ଦ୍ରପ୍ରସ୍ଥ ଗ୍ୟାସ ଲିମିଟେଡ୍ (IGL)ରେ ମାର୍ଚ୍ଚ ୩୧ ପୂର୍ବରୁ ନୂଆ ସଂଯୋଗ ନେଇ ଗ୍ୟାସ ବ୍ୟବହାର ଆରମ୍ଭ କଲେ ୫୦୦ ଟଙ୍କାର ମାଗଣା ଗ୍ୟାସ ମିଳିବ। GAIL ଏବଂ BPCL ଦୁଇ ପ୍ରମୁଖ କମ୍ପାନୀ ମଧ୍ୟ ନୂଆ ଗ୍ରାହକଙ୍କ ପାଇଁ ସ୍ୱତନ୍ତ୍ର ପ୍ରୋତ୍ସାହନ ରାଶି ଘୋଷଣା କରିଛନ୍ତି।
ବିଶେଷଜ୍ଞଙ୍କ ମତରେ, PNG ହେଉଛି LPG ତୁଳନାରେ ଏକ ଅଧିକ ସ୍ୱଚ୍ଛ ଏବଂ ନିରାପଦ ଇନ୍ଧନ। ଏହା ସିଧାସଳଖ ପାଇପ୍ ମାଧ୍ୟମରେ ଯୋଗାଇ ଦିଆଯାଉଥିବାରୁ ସିଲିଣ୍ଡର ବୁକିଂ କିମ୍ବା ଷ୍ଟୋରେଜ୍ର କୌଣସି ଝାମେଲା ରହିବ ନାହିଁ। ବିଶେଷ କରି ବିଶ୍ୱ ବଜାରରେ ଜାରି ରହିଥିବା ଭୂ-ରାଜନୈତିକ ଉତେଜନାକୁ ଦୃଷ୍ଟିରେ ରଖି ଘରୋଇ ଇନ୍ଧନ ସୁରକ୍ଷା ପାଇଁ ସରକାର ଏହି ପଦକ୍ଷେପକୁ ଗୁରୁତ୍ୱ ଦେଉଛନ୍ତି।