ଏହି ଶିଖର ସମ୍ମିଳନୀର ସଫଳତାର ସହିତ ଆୟୋଜନ ପାଇଁ ମୁଁ ଥାଇଲ୍ୟାଣ୍ଡର ପ୍ରଧାନମନ୍ତ୍ରୀ ମହାମହିମ ସିନାଓ୍ୱାତ୍ରାଜୀଙ୍କୁ କୃତଜ୍ଞତା ଜଣାଉଛି।
ମହାମହିମ
ସର୍ବପ୍ରଥମେ, ଭାରତର ଜନସାଧାରଣଙ୍କ ପକ୍ଷରୁ, ମୁଁ ମିଆଁମାର ଏବଂ ଥାଇଲ୍ୟାଣ୍ଡରେ ସମ୍ପ୍ରତି ଭୂମିକମ୍ପ ଯୋଗୁଁ ହୋଇଥିବା ଜୀବନ ଏବଂ ସମ୍ପତ୍ତି କ୍ଷତି ପାଇଁ ଗଭୀର ସମବେଦନା ଜଣାଉଛି ଆମେ ପ୍ରଭାବିତ ଲୋକଙ୍କ ସହିତ ଏକତାର ସହ ଠିଆ ହୋଇଛୁ ଏବଂ ଆହତମାନଙ୍କର ଶୀଘ୍ର ଏବଂ ସମ୍ପୂର୍ଣ୍ଣ ଆରୋଗ୍ୟ କାମନା କରୁଛୁ।
ମହାମହିମ,
ଗତ ତିନି ବର୍ଷ ଧରି ବିମଷ୍ଟେକକୁ ପରିଚାଳନା କରିବାରେ ଦକ୍ଷ ଏବଂ ପ୍ରଭାବଶାଳୀ ନେତୃତ୍ୱ ପାଇଁ ମୁଁ, ପ୍ରଧାନମନ୍ତ୍ରୀ ଏବଂ ତାଙ୍କ ଦଳକୁ ପ୍ରଶଂସା କରୁଛି।
ବିମଷ୍ଟେକ ଦକ୍ଷିଣ ଏସିଆ ଏବଂ ପୂର୍ବ ଏସିଆକୁ ସଂଯୋଗ କରୁଥିବା ଏକ ସେତୁ ଏବଂ ଆଞ୍ଚଳିକ ସଂଯୋଗ, ସହଯୋଗ ଏବଂ ସମୃଦ୍ଧିର ନୂତନ ରାସ୍ତା ଖୋଲିବା ପାଇଁ ଏକ ପ୍ରଭାବଶାଳୀ ମଞ୍ଚ ଭାବରେ ଉଭା ହେଉଛି।
ଏହା ଖୁସିର କଥା ଯେ ‘ବିମଷ୍ଟେକ ଚାର୍ଟର’ ଗତ ବର୍ଷ କାର୍ଯ୍ୟକାରୀ ହୋଇଛି। ମୁଁ ନିଶ୍ଚିତ ଯେ ଆଜି ଆମେ ଯେଉଁ ‘ବ୍ୟାଙ୍କକ୍ ଭିଜନ ୨୦୩୦ ଗ୍ରହଣ କରୁଛୁ, ତାହା ବଙ୍ଗୋପସାଗର କ୍ଷେତ୍ରରେ ସମୃଦ୍ଧି, ସୁରକ୍ଷା ଏବଂ ଅନ୍ତର୍ଭୁକ୍ତି ପାଇଁ ଆମର ସଂକଳ୍ପକୁ ସାକାର କରିବ।
ମହାମହିମ,
ବିମଷ୍ଟେକକୁ ଆହୁରି ମଜବୁତ କରିବା ପାଇଁ, ଆମକୁ ଏହାର ପରିସର ଏବଂ କ୍ଷମତାକୁ ନିରନ୍ତର ବିସ୍ତାର କରିବାକୁ ପଡିବ।
ଏହା ଖୁସିର କଥା ଯେ ଗୃହମନ୍ତ୍ରୀଙ୍କ କାର୍ଯ୍ୟପ୍ରଣାଳୀକୁ ସଂସ୍ଥାଗତ କରାଯାଉଛି। ଏହି ଫୋରମ୍ ସାଇବର ଅପରାଧ, ସାଇବର ସୁରକ୍ଷା, ଆତଙ୍କବାଦ ବିରୋଧୀ, ନିଶାଦ୍ରବ୍ୟ ଏବଂ ମାନବ ଚାଲାଣ ବିରୋଧରେ ଲଢ଼େଇରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ। ଏଥିପାଇଁ ମୁଁ ଏହି ବର୍ଷ ଭାରତରେ ଏହାର ପ୍ରଥମ ବୈଠକ କରିବାକୁ ପ୍ରସ୍ତାବ ଦେଉଛି।
ମହାମହିମ,
ଆଞ୍ଚଳିକ ବିକାଶ ପାଇଁ, ଭୌତିକ ସହିତ ଡିଜିଟାଲ୍ ଏବଂ ଶକ୍ତି ସଂଯୋଗ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
ମୁଁ ଖୁସି ଯେ ବେଙ୍ଗାଲୁରୁରେ ବିମଷ୍ଟେକ ଶକ୍ତି କେନ୍ଦ୍ର କାର୍ଯ୍ୟ କରିବା ଆରମ୍ଭ କରିଛି। ମୁଁ ପରାମର୍ଶ ଦେଉଛି ଯେ ଆମର ଦଳଗୁଡ଼ିକ ବୈଦ୍ୟୁତିକ ଗ୍ରୀଡ୍ ଇଣ୍ଟରକନେକ୍ସନ୍ ଉପରେ ଦ୍ରୁତ ଗତିରେ କାମ କରନ୍ତୁ।
ଡିଜିଟାଲ୍ ସାର୍ବଜନୀନ ଭିତ୍ତିଭୂମି ଅର୍ଥାତ୍ DPI ଭାରତରେ ସାର୍ବଜନୀନ ସେବା ପ୍ରଦାନରେ ଏକ ବିପ୍ଳବ ଆଣିଛି। ଉତ୍ତମ ଶାସନ ଏବଂ ସ୍ୱଚ୍ଛତା ବୃଦ୍ଧି ପାଇଛି। ଏବଂ ଆର୍ଥିକ ଅନ୍ତର୍ଭୁକ୍ତିକରଣକୁ ପ୍ରୋତ୍ସାହନ ମିଳିଛି। ଆମେ ବିମଷ୍ଟେକ ଦେଶମାନଙ୍କ ସହିତ DPI ଅଭିଜ୍ଞତା ବାଣ୍ଟିବାକୁ ଖୁସି ହେବୁ। ଏଥିପାଇଁ, ବିମଷ୍ଟେକ ଦେଶଗୁଡ଼ିକର ଆବଶ୍ୟକତାକୁ ବୁଝିବା ପାଇଁ ଏକ ପାଇଲଟ୍ ଅଧ୍ୟୟନ କରାଯାଇପାରିବ।
ଏହା ବ୍ୟତୀତ, ମୁଁ ଭାରତର ଏକୀକୃତ ପେମେଣ୍ଟ ଇଣ୍ଟରଫେସ୍, ଅର୍ଥାତ୍ UPI ଏବଂ ବିମଷ୍ଟେକ କ୍ଷେତ୍ରର ପେମେଣ୍ଟ ସିଷ୍ଟମ ମଧ୍ୟରେ ସଂଯୋଗ ସ୍ଥାପନର ପ୍ରସ୍ତାବ ଦେଉଛି। ଏହା ସବୁ ସ୍ତରରେ ବାଣିଜ୍ୟ, ଶିଳ୍ପ ଏବଂ ପର୍ଯ୍ୟଟନକୁ ଲାଭ ଦେବ।
ମହାମହିମ,
ଆମର ପ୍ରଗତି ପାଇଁ ବାଣିଜ୍ୟ ଏବଂ ବ୍ୟବସାୟିକ ସଂଯୋଗ ମଧ୍ୟ ଗୁରୁତ୍ୱପୂର୍ଣ୍ଣ।
ଆମ ବ୍ୟବସାୟ ମଧ୍ୟରେ ସହଯୋଗ ଏବଂ ସମନ୍ୱୟ ବୃଦ୍ଧି କରିବା ପାଇଁ, ମୁଁ ବିମଷ୍ଟେକ ଚାମ୍ବର ଅଫ୍ କମର୍ସ ପ୍ରତିଷ୍ଠା କରିବାକୁ ପ୍ରସ୍ତାବ ଦେଉଛି। ଏହା ବ୍ୟତୀତ, ପ୍ରତିବର୍ଷ ବିମଷ୍ଟେକ ବ୍ୟବସାୟ ସମ୍ମିଳନୀ ମଧ୍ୟ ଆୟୋଜିତ ହେବ।
ମୁଁ ପରାମର୍ଶ ଦେଉଛି ଯେ ବିମଷ୍ଟେକ ଅଞ୍ଚଳରେ ସ୍ଥାନୀୟ ମୁଦ୍ରାରେ ବାଣିଜ୍ୟର ସମ୍ଭାବନା ଉପରେ ଏକ ସମ୍ଭାବ୍ୟତା ଅଧ୍ୟୟନ ମଧ୍ୟ କରାଯିବା ଉଚିତ।
ମହାମହିମ,
ମୁକ୍ତ, ଖୋଲା, ସୁରକ୍ଷିତ ଏବଂ ନିରାପଦ ଭାରତ ମହାସାଗର ଆମର ସାଧାରଣ ପ୍ରାଥମିକତା। ଆଜି ସମାପ୍ତ ହୋଇଥିବା ସାମୁଦ୍ରିକ ପରିବହନ ଚୁକ୍ତିନାମା ବାଣିଜ୍ୟିକ ପରିବହନ ଏବଂ ମାଲ ପରିବହନ କ୍ଷେତ୍ରରେ ସହଯୋଗକୁ ସୁଦୃଢ଼ କରିବ। ବ୍ୟବସାୟ ଗତିଶୀଳ ହେବ।
ଆମେ ଭାରତରେ ଏକ ସ୍ଥାୟୀ ସାମୁଦ୍ରିକ ପରିବହନ କେନ୍ଦ୍ର ପ୍ରତିଷ୍ଠା କରିବାକୁ ପ୍ରସ୍ତାବ ଦେଉଛୁ। ଏହି କେନ୍ଦ୍ର ସାମୁଦ୍ରିକ ନୀତିରେ କ୍ଷମତା ନିର୍ମାଣ, ଗବେଷଣା, ନବସୃଜନ ଏବଂ ସମନ୍ୱୟ ବୃଦ୍ଧି ପାଇଁ କାର୍ଯ୍ୟ କରିବ। ସାମୁଦ୍ରିକ ସୁରକ୍ଷା କ୍ଷେତ୍ରରେ ଆମର ସହଯୋଗ ମଧ୍ୟ ବୃଦ୍ଧି ପାଇବ।
ମହାମହିମ,
ସାମ୍ପ୍ରତିକ ଭୂମିକମ୍ପ ଆମକୁ ମନେ ପକାଇଦେଲା ଯେ ବିମଷ୍ଟେକ ଅଞ୍ଚଳ ପ୍ରାକୃତିକ ବିପର୍ଯ୍ୟୟ ପ୍ରତି କେତେ ସମ୍ବେଦନଶୀଳ।
ଭାରତ ସର୍ବଦା ତା’ର ବନ୍ଧୁ ଦେଶମାନଙ୍କ ପାଇଁ ପ୍ରଥମ ପ୍ରତିକ୍ରିୟାକାରୀ ଭାବରେ କାର୍ଯ୍ୟ କରେ। ଏହା ଆମର ସୌଭାଗ୍ୟ ଯେ ଆମେ ମିଆଁମାରର ଲୋକମାନଙ୍କୁ ସମୟୋଚିତ ରିଲିଫ୍ ଯୋଗାଇପାରିଛୁ। ବିପର୍ଯ୍ୟୟକୁ ରୋକାଯାଇପାରିବ ନାହିଁ, କିନ୍ତୁ ଆମକୁ ସର୍ବଦା ଏହାର ମୁକାବିଲା ପାଇଁ ପ୍ରସ୍ତୁତ ରହିବାକୁ ପଡିବ।
ଏହି ପରିପ୍ରେକ୍ଷୀରେ, ମୁଁ ଭାରତରେ ବିପର୍ଯ୍ୟୟ ପରିଚାଳନା ପାଇଁ ବିମଷ୍ଟେକ ଉତ୍କର୍ଷ କେନ୍ଦ୍ର ପ୍ରତିଷ୍ଠା କରିବାକୁ ପ୍ରସ୍ତାବ ଦେଉଛି। ଏହି କେନ୍ଦ୍ର ବିପର୍ଯ୍ୟୟ ପରିଚାଳନା, ରିଲିଫ୍ ଏବଂ ପୁନର୍ବାସରେ ସହାୟତା କରିବ। ଏହା ସହିତ, ଏହି ବର୍ଷ ବିମଷ୍ଟେକ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷଙ୍କ ମଧ୍ୟରେ ଚତୁର୍ଥ ମିଳିତ ଅଭ୍ୟାସ ଭାରତରେ ଅନୁଷ୍ଠିତ ହେବ।
ମହାମହିମ,
ସାର୍ବଜନୀନ ସ୍ୱାସ୍ଥ୍ୟ ଆମର ସାମାଜିକ ପ୍ରଗତିରେ ଏକ ଗୁରୁତ୍ୱପୂର୍ଣ୍ଣ ସ୍ତମ୍ଭ।
ମୁଁ ଖୁସିର ସହିତ କହୁଛି ଯେ ଭାରତ ବିମଷ୍ଟେକ ଦେଶଗୁଡ଼ିକରେ କର୍କଟ ଚିକିତ୍ସାରେ ତାଲିମ ଏବଂ କ୍ଷମତା ନିର୍ମାଣ ପାଇଁ ସହାୟତା ଯୋଗାଇବ। ସାମଗ୍ରିକ ସ୍ୱାସ୍ଥ୍ୟର ଦୃଷ୍ଟିକୋଣ ସହିତ, ପାରମ୍ପରିକ ଔଷଧର ଗବେଷଣା ଏବଂ ପ୍ରସାର ପାଇଁ ଏକ ଉତ୍କର୍ଷ କେନ୍ଦ୍ର ପ୍ରତିଷ୍ଠା କରାଯିବ।
ସେହିପରି, କୃଷକମାନଙ୍କ ଲାଭ ପାଇଁ ଜ୍ଞାନ ଏବଂ ସର୍ବୋତ୍ତମ ଅଭ୍ୟାସ, ଗବେଷଣା ଏବଂ ଦକ୍ଷତା ନିର୍ମାଣର ଆଦାନପ୍ରଦାନ ପାଇଁ ଆମେ ଭାରତରେ ଏକ ଉତ୍କର୍ଷ କେନ୍ଦ୍ର ଖୋଲିବାକୁ ପ୍ରସ୍ତାବ ଦେଉଛୁ।
ମହାମହିମ,
ମହାକାଶ କ୍ଷେତ୍ରରେ ଭାରତୀୟ ବୈଜ୍ଞାନିକମାନଙ୍କ ଦ୍ୱାରା କରାଯାଇଥିବା ପ୍ରଗତି ଗ୍ଲୋବାଲ୍ ସାଉଥ୍ର ସମସ୍ତ ଯୁବପିଢ଼ିଙ୍କ ପାଇଁ ପ୍ରେରଣାର ଉତ୍ସ। ଆମେ ଆମର ଅଭିଜ୍ଞତା ଆପଣମାନଙ୍କ ସହିତ ବାଣ୍ଟିବାକୁ ପ୍ରସ୍ତୁତ।
ଏହି ପରିପ୍ରେକ୍ଷୀରେ, ମୁଁ ବିମଷ୍ଟେକ ଦେଶମାନଙ୍କ ପାଇଁ ମାନବଶକ୍ତି ତାଲିମ, ନାନୋ ସାଟେଲାଇଟ୍ ନିର୍ମାଣ ଏବଂ ଉତକ୍ଷେପଣ, ଦୂର ସେନ୍ସିଂ ତଥ୍ୟ ବ୍ୟବହାର ପାଇଁ ଭୂମି ଷ୍ଟେସନ ସ୍ଥାପନ ପ୍ରସ୍ତାବ ଦେଉଛି।
ମହାମହିମ,
ଯୁବପିଢ଼ିଙ୍କୁ ଦକ୍ଷତା ପ୍ରଦାନ କରିବା ପାଇଁ, ଆମେ “ବୋଧି”, ଅର୍ଥାତ୍ “ମାନବ ସମ୍ବଳ ଭିତ୍ତିଭୂମିର ସଂଗଠିତ ବିକାଶ ପାଇଁ ବିମଷ୍ଟେକ” ପ୍ରୟାସ ଆରମ୍ଭ କରିବୁ।
ଏହା ଅଧୀନରେ, ପ୍ରତିବର୍ଷ ବିମଷ୍ଟେକ ଦେଶଗୁଡ଼ିକର ୩୦୦ ଯୁବକଙ୍କୁ ଭାରତରେ ତାଲିମ ଦିଆଯିବ।
ଭାରତୀୟ ବନ ଗବେଷଣା ପ୍ରତିଷ୍ଠାନରେ ବିମଷ୍ଟେକ ଛାତ୍ରଛାତ୍ରୀମାନଙ୍କୁ ଛାତ୍ରବୃତ୍ତି ପ୍ରଦାନ କରାଯିବ। ନାଳନ୍ଦା ବିଶ୍ୱବିଦ୍ୟାଳୟରେ ଛାତ୍ରବୃତ୍ତି ଯୋଜନାକୁ ମଧ୍ୟ ବିସ୍ତାର କରାଯିବ। ବିମଷ୍ଟେକ ଦେଶଗୁଡ଼ିକର ଯୁବ କୂଟନୀତିଜ୍ଞଙ୍କ ପାଇଁ ପ୍ରତିବର୍ଷ ଏକ ତାଲିମ କାର୍ଯ୍ୟକ୍ରମ ଆୟୋଜନ କରାଯିବ।
ମହାମହିମ,
ଆମର ସହଭାଗୀ ସାଂସ୍କୃତିକ ଐତିହ୍ୟ ହେଉଛି ଆମ ସମ୍ପର୍କର ଦୃଢ଼ ମୂଳଦୁଆ।
ଓଡ଼ିଶାର ‘ବାଲି ଯାତ୍ରା’, ବୌଦ୍ଧ ଏବଂ ହିନ୍ଦୁ ପରମ୍ପରା ମଧ୍ୟରେ ଗଭୀର ଐତିହାସିକ ସମ୍ପର୍କ, ଆମର ଭାଷା, ଏସବୁ ଆମର ସାଂସ୍କୃତିକ ସମ୍ପର୍କର ପ୍ରତୀକ।
ଏହି ସମ୍ପର୍କଗୁଡ଼ିକୁ ଉଜ୍ଜ୍ୱଳ କରିବା ପାଇଁ, ଚଳିତ ବର୍ଷ ଭାରତରେ ପ୍ରଥମ ବିମଷ୍ଟେକ ପାରମ୍ପରିକ ସଙ୍ଗୀତ ମହୋତ୍ସବ ଆୟୋଜନ କରାଯିବ।
ମହାମହିମ,
ଆମ ଯୁବପିଢ଼ିଙ୍କ ମଧ୍ୟରେ ଆଦାନପ୍ରଦାନ ବୃଦ୍ଧି କରିବା ପାଇଁ, ଏହି ବର୍ଷ ବିମଷ୍ଟେକ ଯୁବ ନେତା ସମ୍ମିଳନୀ ଅନୁଷ୍ଠିତ ହେବ। ଏବଂ, ବିମଷ୍ଟେକ ହାକାଥନ୍ ଏବଂ ଯୁବ ବୃତ୍ତିଗତ ପରିଦର୍ଶକ କାର୍ଯ୍ୟକ୍ରମ ଆରମ୍ଭ କରାଯିବ।
କ୍ରୀଡା କ୍ଷେତ୍ରରେ, ମୁଁ ଏହି ବର୍ଷ ଭାରତରେ ‘ବିମଷ୍ଟେକ ଆଥଲେଟିକ୍ସ ସମ୍ମିଳନୀ’ ଆୟୋଜନ କରିବାକୁ ପ୍ରସ୍ତାବ ଦେଉଛି। ୨୦୨୭ ମସିହାରେ, ବିମଷ୍ଟେକର ୩୦ତମ ବାର୍ଷିକୀ ଅବସରରେ, ଆମେ ପ୍ରଥମ ବିମଷ୍ଟେକ କ୍ରୀଡ଼ା ଆୟୋଜନ କରିବାକୁ ଘୋଷଣା କରୁଛୁ।
ମହାମହିମ,
ବିମଷ୍ଟେକ ଆମ ପାଇଁ କେବଳ ଏକ ଆଞ୍ଚଳିକ ସଂଗଠନ ନୁହେଁ। ଏହା ହେଉଛି ଆମର ଅନ୍ତର୍ଭୁକ୍ତ ବିକାଶ ଏବଂ ସୁରକ୍ଷାର ମଡେଲ। ଏହା ଆମର ସହଭାଗୀ ସଂକଳ୍ପ ଏବଂ ସାମୂହିକ ଶକ୍ତିର ପ୍ରତୀକ ।
ଏହା ‘ସବ୍କା ସାଥ୍, ସାବକା ବିକାଶ, ସାବକା ପ୍ରୟାସ ‘ ର ସଂକଳ୍ପର ଏକ ସଠିକ ପ୍ରଦର୍ଶନ |
ମୁଁ ନିଶ୍ଚିତ ଯେ ଆମେ ଏକତା, ସହଯୋଗ ଏବଂ ବିଶ୍ୱାସର ଭାବନାକୁ ଆହୁରି ମଜବୁତ କରିବୁ, ଏବଂ ମିଳିତ ଭାବରେ ବିମଷ୍ଟେକକୁ ନୂତନ ଶିଖରରେ ପହଞ୍ଚାଇବୁ!
ଶେଷରେ, ମୁଁ ବିମଷ୍ଟେକର ଆଗାମୀ ଅଧ୍ୟକ୍ଷ ବାଂଲାଦେଶକୁ ସ୍ୱାଗତ କରୁଛି ଏବଂ ସମସ୍ତଙ୍କୁ ଶୁଭକାମନା ଜଣାଉଛି।
ବହୁତ ବହୁତ ଧନ୍ୟବାଦ!