‘ସେପ୍ଟେମ୍ବର ୨୨ ତାରିଖ ସୁଦ୍ଧା ୧୨.୪୫ କୋଟି ଟଙ୍କା ଦାଖଲ କର ନଚେତ୍ ତିହାର ଜେଲକୁ ଯିବା ପାଇଁ ପ୍ରସ୍ତୁତ ହୁଅ ।’ ଏକ ଠକେଇ ମାମଲାର ବିଚାର କରି ସୁପ୍ରିମକୋର୍ଟ ସ୍ପାଇସଜେଟ୍ ମୁଖିଆ ଅଜୟ ସିଂଙ୍କୁ ଏହି ଧମକ ଦେଇଛନ୍ତି । ଜଷ୍ଟିସ ବିକ୍ରମ ନାଥ ଓ ଜଷ୍ଟିସ ଅହସାନୁଦ୍ଦିନ୍ ଅମାନୁଲ୍ଲାହଙ୍କ ଖଣ୍ଡପୀଠ ୨୦୧୫ର କ୍ରେଡିଟ୍ ସୁଇସ୍ କେସ ମାମଲାର ଶୁଣାଣି କରି ସୋମବାର ଆଦେଶ ଜାରି କରିଛନ୍ତି । ବିଚାରପତି କହିଛନ୍ତି- ବହୁତ ବିଚାର ହୋଇଗଲା । ଏବେ ଆମକୁ କଠୋର ନିଷ୍ପତି ନେବାକୁ ପଡ଼ିବ । ସ୍ପାଇସଜେଟ୍ ବନ୍ଦ ହୋଇଗଲେ ଆମ ଉପରେ କିଛି ପ୍ରଭାବ ପଡ଼ିବନି । ମାତ୍ର ଅଜୟ ସିଂଙ୍କୁ ରାଜିନାମାର ପ୍ରତିଟି ସର୍ତକୁ ମାନିବାକୁ ପଡ଼ିବ ।
ପ୍ରତିଟି ଶୁଣାଣିରେ ହାଜର ରହିବାକୁ ଖଣ୍ଡପୀଠ ଅଜୟ ସିଂଙ୍କୁ ନିର୍ଦ୍ଦେଶ ଦେଇଛନ୍ତି । ଖଣ୍ଡପୀଠ ନିଷ୍ପତି ମୁତାବକ ୧୨.୪୫ କୋଟି ଟଙ୍କା ଭିତରୁ ୪.୧୫ କୋଟି କିସ୍ତି ପଇଠ ବାବଦକୁ ଓ ୮.୨୯ କୋଟି ଟଙ୍କା ବକେୟା ପଇଠ ବାବଦକୁ ଦାଖଲ କରିବାକୁ ପଡ଼ିବ । ଜଣାପଡ଼ିଛି, ଅଗଷ୍ଟ ୧୪ ତାରିଖରେ ସୁପ୍ରିମକୋର୍ଟ ଅଜୟ ସିଂଙ୍କ ବିରୋଧରେ ଅଦାଲତ ଅବମାନନା ନୋଟିସ ଜାରି କରିଥିଲେ । ଅଜୟ ସିଂ ଜାଣିଶୁଣି ରାଜିନାମା ସର୍ତକୁ ଅମାନ୍ୟ କରିଥିଲେ ବୋଲି କୋର୍ଟଙ୍କର ହୃଦବୋଧ ହୋଇଥିଲା । କୋର୍ଟଙ୍କ ଆଦେଶକୁ ଅମାନ୍ୟ କରି ଅଜୟ ସିଂ ୧୯୯.୨୫ କୋଟି ଟଙ୍କା ପଇଠ କରି ନଥିଲେ ।
ମାମଲାଟି ଏହିପରି, ବିମାନ ଇଞ୍ଜିନ ପରିଚାଳନା ପାଇଁ ସ୍ପାଇସଜେଟ୍ ୨୦୧୧ରେ ସ୍ୱିଜରଲ୍ୟାଣ୍ଡ କମ୍ପାନୀ ଏସଆରଟି ଟେକ୍ନିକ୍ସ ସହିତ ବୁଝାମଣା କରିଥିଲା । ରାଜିନାମାର ଅବଧି ୧୦ ବର୍ଷ ପାଇଁ ଥିଲା । କିନ୍ତୁ ଠିକ ସମୟରେ ପରିଚାଳନା ଖର୍ଚ୍ଚ ପଇଠ କରୁ ନଥିବା ଅଭିଯୋଗ ଆଣି ସ୍ୱିସ୍ କମ୍ପାନୀ ସ୍ପାଇସଜେଟ୍ ବିରୋଧରେ ଅଦାଲତକୁ ଯାଇଥିଲା । ମାମଲାର ବିଚାର କରି ମାଡ୍ରାସ କୋର୍ଟ ସ୍ପାଇସଜେଟକୁ ୨୦୨୧ ପର୍ଯ୍ୟନ୍ତ ବନ୍ଦ କରିଦେବାକୁ ଆଦେଶ ଦେଇଥିଲେ ।
ହାଇକୋର୍ଟଙ୍କ ଆଦେଶକୁ ଚାଲେଞ୍ଜ କରି ସ୍ପାଇସଜେଟ୍ ସୁପ୍ରିମକୋର୍ଟକୁ ଯାଇଥିଲା । ଆପୋଷ ଆଲୋଚନା ଜରିଆରେ ମାମଲାର ସମାଧାନ କରିବାକୁ ସୁପ୍ରିମକୋର୍ଟ ପରାମର୍ଶ ଦେଇଥିଲେ । ତଦନୁସାରେ ନିର୍ଦ୍ଧାରିତ ସମୟ ଭିତରେ (୨୦୨୨ ମେ’ ସୁଦ୍ଧା) କ୍ରେଡିଟ୍ ସୁଇସକୁ ୧୯୯ କୋଟି ଟଙ୍କା ପଇଠ କରିବାକୁ ସ୍ପାଇସଜେଟ୍ ରାଜି ହୋଇଥିଲା । ମାତ୍ର ପରେ ଖିଲାଫ କରିଥିଲା ।