ସାମୁଦ୍ରିକ ବାତ୍ୟା ‘ଦାନା’ ସଂପର୍କରେ ନାନା ମନଗଢ଼ା କଥା କହି କିଛି ଗଣମାଧ୍ୟମ ଅଧିକ ଦର୍ଶକ ପାଇବା ଆଶା ରଖିଛନ୍ତି । ‘ଦାନା’ର ବିକଟାଳ ଚେହେରା ସଂପର୍କରେ ଲୋକଙ୍କୁ ଡରାଇବାର ଉଦ୍ୟମ କରୁଛନ୍ତି । ତିଳକୁ ତାଳ କରି ଉପକୂଳ ବାସୀଙ୍କ ମନରେ ଛନକା ସୃଷ୍ଟି କରୁଛନ୍ତି । ଲୋକମାନେ ଯେତିକି ମାତ୍ରାରେ ଡରିବେ, ସଂପୃକ୍ତ ଗଣମାଧ୍ୟମ ସେତିିକି ମଜା ନେବ ବୋଲି ଭାବୁଛନ୍ତି ।
ଓଡ଼ିଶା ଉପକୂଳର କୋଉ ଅଂଚଳକୁ ବାତ୍ୟା ସ୍ପର୍ଶ କରିବ, ସେ ସଂପର୍କରେ ପାଣିପାଗ ବିଭାଗ ଏବେ ମଧ୍ୟ ଜାଣିପାରିନି । ମାତ୍ର କିଛି ଗଣମାଧ୍ୟମ ସେ ବିଷୟରେ ଆଗୁଆ ସୂଚନା ଦେଇ ଲୋକଙ୍କୁ ଡରାଉଛନ୍ତି । ସୋମବାର ଅପରାହ୍ଣ ସୁଦ୍ଧା ପାଣିପାଗ ବିଭାଗର ବାତ୍ୟାର କରାଳ ରୂପ ସଂପର୍କରେ ସ୍ପଷ୍ଟ ଚିତ୍ର ପ୍ରଦାନ କରିନି ।
କିନ୍ତୁ କିଛି ଗଣମାଧ୍ୟମ ପ୍ରଚାର କରୁଛନ୍ତି ଯେ ବାତ୍ୟାଟି ପାରାଦ୍ୱୀପ, ପୁରୀ–କୋଣାର୍କ ବେଳାଭୂମି, ଧାମରା, ରାଜକନିକା ଉପକୂଳରେ ପିଟିହେବ । ଲୋକମାନଙ୍କୁ ଆମ ଗଣମାଧ୍ୟମ ପକ୍ଷରୁ ଜଣାଇ ଦିଆଯାଉଛି କି ସେମାନେ ଜାତୀୟ ଅବା ଆଂଚଳିକ ଦୂରଦର୍ଶନରେ ପ୍ରସାରିତ ବାତ୍ୟା ସୂଚନାକୁ ସତ ମଣିପାରିବେ ।
ଦାନା ପ୍ରଭାବରେ ଘଂଟାକୁ ସର୍ବାଧିକ ୧୫୦ କିଲୋମିଟର ପବନ ବହିବାର ପୂର୍ବାନୁମାନ କରାଯାଉଛି । ପୂର୍ବାନୁମାନ ଅନୁସାରେ ଆମକୁ ସତର୍କ ରହିବା ପାଇଁ କୁହାଯାଉଛି । ଉପକୂଳ ଓଡ଼ିଶାରେ ଅଧିକ କ୍ଷତି ହେବାର ଆଶଙ୍କା କରାଯାଉଛି । ତେଣୁ କଟକ, ପୁରୀ, ଜଗତସିଂପୁର, କେନ୍ଦ୍ରାପଡ଼ା, ଭଦ୍ରକ, ବାଲେଶ୍ୱର ଜିଲ୍ଲାର ଲୋକମାନେ ସତର୍କ ରହିବାକୁ କୁହାଯାଉଛି । ବାତ୍ୟା ପ୍ରକୋପରେ ଉପକୂଳ ଗଞ୍ଜାମରେ ଭୀଷଣ ବର୍ଷା ହୋଇପାରେ । ସମୁଦ୍ର ଅଶାନ୍ତ ରହିବ । ୨୬ ତାରିଖ ସକାଳ ସୁଦ୍ଧା ବାତ୍ୟା ଓଡ଼ିଶା ଉପକୂଳରୁ ଦୂରକୁ ଚାଲିଯିବ ।