ଭୁବନେଶ୍ୱର: ଭୁବନେଶ୍ୱରସ୍ଥିତ ଜୟଦେବ ଭବନରେ ସାକ୍ସୀ ୱାର୍ଲଡ ଚାରିଟେବୁଲ ଟ୍ରଷ୍ଟ ପକ୍ଷରୁ ଦ୍ୱାଦଶ ସ୍ୱନକ୍ଷତ୍ର ପାଳିତ ହୋଇଯାଇଛି । ଗଣତନ୍ତ୍ରର ମହାପର୍ବ ପୂର୍ବରୁ ଯୁବ ସମାଜକୁ ଗଣତନ୍ତ୍ରର ପାଠ ପଢ଼ାଇ ସାକ୍ସୀ ୱାର୍ଲଡ ପରିବାର ସମାଜର ସବୁ ବର୍ଗର ଲୋକଙ୍କ ମନକୁ ଆକର୍ଷିତ କରିପାରିଛି ।
ଯୁବ ସମାଜସେବୀ ବବଲୁ ବାଗଙ୍କ ସଭାପତିତ୍ୱରେ ଅନୁଷ୍ଠିତ ଆଲୋଚନା ଚକ୍ରରେ ମୁଖ୍ୟ ଆଲୋଚକ ଥିଲେ ମନ୍ତ୍ରରାଜ ଆଚାର୍ଯ୍ୟ ଧର୍ମରାଜ । ବିଶିଷ୍ଟ ଆଇନଜୀବୀ ସୁଭାଷ ଚନ୍ଦ୍ର ମହାନ୍ତି ମୁଖ୍ୟ ଅତିଥି ଭାବେ ଯୋଗଦାନ କରିଥିଲେ ।
ଗଣତାନ୍ତ୍ରିକ ରାଷ୍ଟ୍ରର ଠାକୁରମାନଙ୍କୁ ପ୍ରଥମେ କୁକୁର ଭଳି ସଜାଗ ରହିବାକୁ ଆଚାର୍ଯ୍ୟ ଧର୍ମରାଜ ପରାମର୍ଶ ଦେଇଥିଲେ । ମହାଭାରତ ଯୁଦ୍ଧରେ ଅର୍ଜୁନଙ୍କ ରଥରେ ସାରଥୀ ହୋଇ ଭଗବାନ ଶ୍ରୀକୃଷ୍ଣ ଜଣାଇ ଦେଇଛନ୍ତି ଯେ ଭକ୍ତ ଓ ଭଗବାନଙ୍କ ମଧ୍ୟରେ ଜଣେ ଅନ୍ୟର ପରିପୂରକ । ଜଣକ ବିନା ଅନ୍ୟ ଜଣକର ଅସ୍ତିତ୍ୱ ନାହିଁ । ଅତଏବ ଗଣତନ୍ତ୍ରର ନାଗରିକମାନଙ୍କୁ ମତଦାନ ଭଳି ଗୁରୁଦାୟିତ୍ୱ ତୁଲାଇବା ପାଇଁ ଆଚାର୍ଯ୍ୟ ଧର୍ମରାଜ ପରାମର୍ଶ ଦେଇଥିଲେ ।
ମୁଖ୍ୟ ଅତିଥି ଆଇନଜୀବୀ ସୁଭାଷ ଚନ୍ଦ୍ର ମହାନ୍ତି ସାଧାରଣ ଜନତାଙ୍କୁ ମୌଳିକ ଅଧିକାର ଓ ମୌଳିକ କର୍ତବ୍ୟ ପ୍ରତି ସଚେତନ ରହିବାକୁ କହିଥିଲେ । ମିଳିତ ପ୍ରତିବାଦ ବିନା ଗଣତନ୍ତ୍ରରେ କୌଣସି କାର୍ଯ୍ୟ ସମ୍ପାଦିତ ହୋଇପାରିବ ନାହିଁ ବୋଲି ସ୍ପଷ୍ଟ କରିଥିଲେ । ଯିଏ ଯେତେ ବଡ଼ ପଦବୀରେ ରହିଥାନ୍ତୁ ନା କାହିଁକି ଆଇନଠାରୁ ଉଦ୍ଧ୍ୱର୍ରେ କେହି ନୁହନ୍ତି ।
ସରୋଜ କୁମାର ବିଶ୍ୱାଳ ସାକ୍ସୀ ୱାର୍ଲଟ ଚାରିଟେବୁଲ ଟ୍ରଷ୍ଟର ବିଭିନ୍ନ ଜନକଲ୍ୟାଣମୂଳକ କାର୍ଯ୍ୟ ସଂପର୍କରେ ଅବଗତ କରିଥିଲେ । ଅନସୂୟା ସାମଲ ସାକ୍ସୀ ୱାର୍ଲଡର ବିଗତ ୧୨ ବର୍ଷର ସଫଳତା ବର୍ଣ୍ଣନା କରିଥିଲେ ।
ଏହି ଅବସରରେ ସାକ୍ସୀ ୱାର୍ଲଡ ପରିବାର ପକ୍ଷରୁ ମୁଖ୍ୟ ଅତିଥି, ମୁଖ୍ୟ ବକ୍ତା, ସମ୍ମାନୀତ ଅତିଥିଙ୍କୁ ସମ୍ମାନୀତ କରାଯାଇଥିଲା । ଟ୍ରଷ୍ଟ ସହିତ ଯୋଡ଼ି ହୋଇ ରହିଥିବା କର୍ମଚାରୀଙ୍କୁ ସମ୍ମାନୀତ କରାଯାଇଥିଲା।