ବ୍ରହ୍ମପୁର: ବ୍ରିଟିଶ ବିରୁଦ୍ଧରେ ତଥା ମୁସ୍ତାଦାର, ଜମିଦାରୀ ବ୍ୟବସ୍ଥା ବିରୁଦ୍ଧରେ ଲଢେଇ କରିଥିବା ବିଶିଷ୍ଟ ଚାଷୀ ନେତା କବିରାଜ ରଘୁନାଥ ପଣ୍ଡାଙ୍କ ଆଜି ୧୭ତମ ତିରୋଧାନ ଦିବସରେ ସମଗ୍ର ବିଶ୍ୱରେ ଦେଖା ଦେଇଥିବା ଯୁଦ୍ଧର ବିଭୀଷିକା ବିରୁଦ୍ଧରେ ଏକ ଜନ ସଭା ଅନୁଷ୍ଠିତ ହୋଇଯାଇଛି l ସ୍ଥାନୀୟ ପାଢ଼ୀ ସେଲିବ୍ରେସନ ସଭାଗୃହରେ ଆୟୋଜିତ ଏହି ସଭାରେ ଆଇନଜୀବୀ ଅବନୀ ଗୟା ଅଧ୍ୟକ୍ଷତା କରିଥିବା ବେଳେ ପରିବେଶବିତ ପ୍ରଫୁଲ୍ଲ ସାମନ୍ତରା ମୁଖ୍ୟ ଅତିଥି ଓ ଗଞ୍ଜାମ ଓକିଲ ସଂଘର ପୂର୍ବତନ ସଭାପତି ତଥା ବରିଷ୍ଠ ଆଇନଜୀବୀ ଭଗବାନ ସାହୁ ଓ ପୂର୍ବତନ ବିଧାୟକ ଏନ.ନାରାୟଣ ରେଡ୍ଡୀ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ l
ସାମ୍ପ୍ରତିକ ପରିସ୍ଥିତିରେ ସମଗ୍ର ବିଶ୍ୱରେ ବର୍ତମାନ ବିଭିନ୍ନ ପ୍ରକାର କାରଣ ଦେଖାଇ ପ୍ରତିଶୋଧ ପରାୟଣ ହୋଇ ଏକ ପ୍ରକାର ଯୁଦ୍ଧର ବାତାବରଣ ସୃଷ୍ଟି କରାଯିବା ସହ ଜନଗଣଙ୍କ ପ୍ରକୃତ ସମସ୍ୟା ସମାଧାନ ଦିଗରେ ଅଣଦେଖା କରାଯାଉଛି l ଜନଗଣଙ୍କ ମୌଳିକ ଆବଶ୍ୟକତା ଓ ମାନବିକ ଅଧିକାରକୁ ଧ୍ବଂସ କରି ଦେଶ ଦେଶ ମଧ୍ୟରେ ଓ ସମ୍ପ୍ରଦାୟ ସମ୍ପ୍ରଦାୟ ମଧ୍ୟରେ ଶତ୍ରୁତା ମନୋଭାବର ପ୍ରଚାର ପ୍ରସାର କରାଯାଉଛି l ଯୁଦ୍ଧାସ୍ତ୍ର, କ୍ଷେପଣାସ୍ତ୍ର, ବୋମା, ଯୁଦ୍ଧ ବିମାନ ଆଦି ନିର୍ମାଣ କରି ବିଭିନ୍ନ ଦେଶକୁ ଚୋରା ଚାଲାଣ କରୁଥିବା ଓ ବିଭିନ୍ନ ଦେଶକୁ ବିକ୍ରି କରୁଥିବା ବିଭିନ୍ନ ପୁଞ୍ଜିପତି ଓ ଦଲାଲ ମାନଙ୍କ ବ୍ୟବସାୟକୁ ବଞ୍ଚାଇବାକୁ, ସୁରକ୍ଷିତ ଭାବେ ଚାଲୁ ରଖିବାକୁ ଯୁଦ୍ଧ ଆବଶ୍ୟମ୍ଭାବି ହୋଇପଡିଛି ଏବଂ ସେମାନଙ୍କ ଇଛା ପ୍ରକାରେ ରାଷ୍ଟ୍ର ବ୍ୟବସ୍ଥା ପରିଚାଳିତ ହେଉଛି l ପରିଣାମ ସ୍ୱରୂପ ଲକ୍ଷ ଲକ୍ଷ ସାଧାରଣ ଜନତା ଅକାଳରେ ଯୁଦ୍ଧର ମୃତ୍ୟୁ ତାଣ୍ଡବର ଶିକାର ହୋଇପଡୁଛନ୍ତି l
ଏହି ଅମାନୁଷିକ ନୃଶଂସ ଷଡଯନ୍ତ୍ର ସମ୍ପର୍କରେ ବିଭିନ୍ନ ଦେଶର ସାଧାରଣ ଜନତା ସଚେତନ ହେବା ନିହାତି ଆବଶ୍ୟକ ବୋଲି ଆଜିର ସଭାରେ ମତ ପ୍ରକାଶ ପାଇଛି l ଅନ୍ୟ ମାନଙ୍କ ମଧ୍ୟରେ ମାନବ ଅଧିକାର ସୁରକ୍ଷା ମଞ୍ଚର ସଭାପତି ଗଗନ ଚନ୍ଦ୍ର ମଲ୍ଲିକ, ଓଡିଶା କୃଷକ ସଭାର ଜିଲ୍ଲା ସମ୍ପାଦକ ଗୋପାଳ ପାଣିଗ୍ରାହୀ, ପୀତବାସ ମହାପାତ୍ର,ସାମ୍ବାଦିକ ବିଘ୍ନେଶ୍ୱର ସାହୁ, ଆଶା କିରଣ ପଣ୍ଡା,କବି ପ୍ରଫୁଲ୍ଲ କୁମାର ମହାପାତ୍ର,ଆପର ଆଦିତ୍ୟ ରଥ ପ୍ରମୁଖ ଆଲୋଚନାରେ ଅଂଶ ଗ୍ରହଣ କରିଥିଲେ ଏବଂ ଶେଷରେ ସୁରେନ୍ଦ୍ର ମହାପାତ୍ର ଧନ୍ୟବାଦ ଜଣାଇଥିଲେ ଓ ରଘୁନାଥ ପଣ୍ଡା ସ୍ମୃତି କମିଟି ସଭାପତି ସୁରେନ୍ଦ୍ର ନାଥ ପଣ୍ଡା, ରବୀନ୍ଦ୍ର ପଣ୍ଡା, ଅମୁଲ୍ୟ ଚନ୍ଦ୍ର ପଣ୍ଡା,ଚିନ୍ମୟୀ ପଣ୍ଡା ଆଦି ପରିଚାଳନାରେ ସହଯୋଗ କରିଥିଲେ l