ସୁବର୍ଣ୍ଣରେଖା ନଦୀରୁ ୨ୟ ବିଶ୍ୱଯୁଦ୍ଧ ଅମଳର ବୋମା ଠାବ
ମୟୂରଭଞ୍ଜ ସୀମାନ୍ତ ଝାଡ଼ଖଣ୍ଡର ପୂର୍ବ ସିଂହଭୂମ ଜିଲ୍ଲା ଅନ୍ତର୍ଗତ ….
ବାରିପଦା: ମୟୂରଭଞ୍ଜ ସୀମାନ୍ତ ଝାଡ଼ଖଣ୍ଡର ପୂର୍ବ ସିଂହଭୂମ ଜିଲ୍ଲା ଅନ୍ତର୍ଗତ ବହରାଗୋଡ଼ା ଅଂଚଳରେ ସୁବର୍ଣ୍ଣରେଖା ନଦୀକୂଳ ବାଲିରୁ ଏକ ଶକ୍ତିଶାଳୀ ତଥା ଜୀବନ୍ତ ବୋମା ଉଦ୍ଧାର କରାଯାଇଛି। ପ୍ରାଥମିକ ତଦନ୍ତରୁ ଜଣାପଡିଛି ଯେ ଏହା ଦ୍ୱିତୀୟ ବିଶ୍ୱଯୁଦ୍ଧ ସମୟର ଏକ ଆମେରିକୀୟ ବୋମା, ଯାହାର ଓଜନ ପ୍ରାୟ ୫୦୦ ପାଉଣ୍ଡ ବା ୨୨୭ କିଲୋଗ୍ରାମ। ଏହି ବିଶାଳକାୟ ବୋମା ମିଳିବା ପରେ ସ୍ଥାନୀୟ ଅଂଚଳରେ ଆତଙ୍କ ଖେଳିଯାଇଥିବା ବେଳେ ପ୍ରଶାସନ ଏବଂ ପୁଲିସ ଆଲର୍ଟ ମୋଡ୍ରେ ଅଛନ୍ତି।
ବୋମାରେ ଲେଖାଅଛି ‘ଆମେରିକାନ୍ ମେଡ୍’। ଗ୍ୟାସ୍ ସିଲିଣ୍ଡର ଭଳି ଦେଖାଯାଉଥିବା ଏହି ବୋମା ଉପରେ ସ୍ପଷ୍ଟ ଭାବରେ ‘ଇଘ-ଗ୬୪ ୫୦୦-ଖଈଟ୍ଟ ଇଜ୍ଞରକ୍ସସମବଦ୍ଭ ଗବୟରଟ୍ଟ ଟଦ୍ଭରଙ୍ଘକ୍ଟ୍ରକ୍ଷକ୍ଟୟରୟ (ଟଢଙ)’ ଲେଖାଯାଇଛି। ବିଶେଷଜ୍ଞଙ୍କ ମତରେ, ଏହା ଏକ ‘ଜେନେରାଲ୍ ପର୍ପସ୍’ ବୋମା, ଯାହା ଅତୀତରେ କୌଣସି ବିମାନରୁ ଖସି ନଦୀବାଲିରେ ପୋତି ହୋଇ ରହିଯାଇଥିଲା ଏବଂ ବିସ୍ଫୋରଣ ହୋଇନଥିଲା। ସ୍ଥାନୀୟ ଲୋକେ ବାଲି ଖୋଳୁଥିବା ସମୟରେ ପାଣିପଡ଼ା-ନାଗୁଡ଼ସାଇ ନିକଟରେ ଏହାକୁ ଠାବ କରିଥିଲେ।
ସେନା ସାହାଯ୍ୟରେ କରାଯିବ ନିଷ୍କ୍ରିୟ ଖବର ପାଇ ସ୍ଥାନୀୟ ପୁଲିସ ଘଟଣାସ୍ଥଳରେ ପହଂଚି ଅଂଚଳକୁ ସିଲ୍ କରିଛି। ରାଂଚିରୁ ଆସିଥିବା ବୋମା ନିଷ୍କ୍ରିୟକାରୀ ଦଳ (ଈକ୍ଟଜ୍ଞଭ ଝକ୍ତଙ୍କବୟ) ଏହାର ଯାଂଚ୍ କରିବା ପରେ ଏହାକୁ ଏକ ଘାତକ ତଥା ଶକ୍ତିଶାଳୀ ବୋମା ବୋଲି ସ୍ପଷ୍ଟ କରିଛନ୍ତି। ଦଳର ପ୍ରଭାରୀ ନନ୍ଦକିଶୋର ସିଂହ କହିଛନ୍ତି ଯେ ଏହାକୁ ସାଧାରଣ ଉପାୟରେ ନିଷ୍କ୍ରିୟ କରିବା ସମ୍ଭବ ନୁହେଁ। ଏଥିପାଇଁ ଉଚ୍ଚସ୍ତରୀୟ ବୈଷୟିକ ଜ୍ଞାନକୌଶଳର ଆବଶ୍ୟକତା ରହିଛି। ତେଣୁ ଏହି ବୋମାକୁ ନିଷ୍କ୍ରିୟ କରିବା ପାଇଁ ଭାରତୀୟ ସେନା ଏବଂ ପଶ୍ଚିମବଙ୍ଗର କଲାଇକୁଣ୍ଡା ଏୟାରଫୋର୍ସ ଷ୍ଟେସନ ସହ ଯୋଗାଯୋଗ କରାଯାଇଛି।
ପ୍ରଶାସନର ସତର୍କତା ଓ ପୂର୍ବ ଘଟଣା ସୁରକ୍ଷା ଦୃଷ୍ଟିରୁ ସ୍ଥାନୀୟ ପ୍ରଶାସନ ଲୋକଙ୍କୁ ବୋମା ନିକଟକୁ ନଯିବା ପାଇଁ କଡ଼ା ନିର୍ଦ୍ଦେଶ ଦେଇଛି। ସୂଚନାଯୋଗ୍ୟ ଯେ, ପ୍ରାୟ ୭ ମାସ ପୂର୍ବେ ପଶ୍ଚିମବଙ୍ଗର ଗୋପୀବଲ୍ଲଭପୁର ଥାନା ଅଂଚଳରେ ଥିବା ସୁବର୍ଣ୍ଣରେଖା ନଦୀରୁ ମଧ୍ୟ ଏଭଳି ଏକ ବୋମା ଉଦ୍ଧାର କରାଯାଇଥିଲା, ଯାହାକୁ କଲାଇକୁଣ୍ଡା ଏୟାରଫୋର୍ସ ଅଧିକାରୀ ମାନେ ସଫଳତାର ସହ ନିଷ୍କ୍ରିୟ କରିଥିଲେ। ବର୍ତମାନ ସେନାର ବିଶେଷଜ୍ଞ ଦଳ ଆସିବା ପର୍ଯ୍ୟନ୍ତ ବହରାଗୋଡ଼ା ପୁଲିସ କଡ଼ା ପ୍ରହରା ଜାରି ରଖିଛି।