୨୦୨୫ ଆଇପିଏଲ: ଧୋନୀଙ୍କୁ ୪ କୋଟି ଟଙ୍କାରେ କିଣିଲା ଚେନ୍ନାଇ

କ୍ରିକେଟର ମହେନ୍ଦ୍ର ସିଂ ଧୋନୀଙ୍କୁ ୪ କୋଟି ଟଙ୍କା ବିନିମୟରେ ହାତେଇ ନେଇଛି ଚେନ୍ନାଇ ସୁପର କିଙ୍ଗ୍‌ସ । ୪୩ ବର୍ଷୀୟ ଧୋନୀଙ୍କ ଯାଦୁକରୀ ବ୍ୟାଟିଂ ଦେଖିବାକୁ ମିଳିବ ୨୦୨୫ ଆଇପିଏଲରେ । ଏ କଥା ମନେପକାଇ ଧୋନୀଙ୍କ ପ୍ରଶଂସକମାନେ ଖୁସିରେ ଆତ୍ମହରା ହୋଇଯାଇଛନ୍ତି ।

ଚେନ୍ନାଇ ସୁପର କିଙ୍ଗ୍‌ସ ଓ ଧୋନୀଙ୍କ ଭିତରେ ସଂପର୍କ ଏତେ ନିବିଡ଼ ହୋଇଯାଇଛି ଯେ ଦୁହେଁ ଦୁହିଁଙ୍କୁ ଛାଡ଼ିବା ପାଇଁ ରାଜି ନୁହନ୍ତି । ଚେନ୍ନାଇ ସୁପର କିଙ୍ଗ୍‌ସ ପକ୍ଷରୁ ଖେଳିବା ପୂର୍ବରୁ ଧୋନୀ ଦୁଇବର୍ଷ ପାଇଁ ରାଇଜିଂ ପୁନେ ସୁପର୍‌ ଜାଏଂଟ୍‌ ପାଇଁ ଖେଳିଥିଲେ ।

ଆଇପିଏଲରେ ସର୍ବାଧିକ ମ୍ୟାଚ୍‌ ଖେଳିବାର ଗୌରବ ଅର୍ଜନ କରିଛନ୍ତି ମହେନ୍ଦ୍ର ସିଂ ଧୋନୀ ।

ସେ ପ୍ରାୟ ୨୬୪ଟି ଆଇପିଏଲ ମ୍ୟାଚ୍‌ ଖେଳି ଏ ଯାବତ୍‌ ୫୨୪୩  ରନ୍‌ କରିଛନ୍ତି । ଆଇପିଏଲରେ ତାଙ୍କର ସର୍ବଶ୍ରେଷ୍ଠ ସ୍କୋର ହେଉଛି  ଅପରାଜିତ ୮୪ ରନ୍‌ । ଆଇପିଏଲର ଟି-୨୦ ସଂସ୍କରଣରେ ମଧ୍ୟ ଧୋନୀଙ୍କ ଯାଦୁକରୀ ବ୍ୟାଟିଂ ଦେଖିବାକୁ ମିଳିଛି ।