ଦୁବାଇ: ଚଳିତ ଆଇପିଏଲ ସଂସ୍କରଣରେ ନଜର ଆସିବେନି ସୁରେଶ ରୈନା। ଚେନ୍ନାଇ ସୁପର କିଂଗ୍ସ ପାଇଁ ସେ କୌଣସି ମ୍ୟାଚ ଖେଳିବେନି। ବ୍ୟକ୍ତିଗତ କାରଣ ପାଇଁ ସେ ଦୁବାଇରୁ ଭାରତ ଫେରିଆସିଛନ୍ତି।
ସିଏସକେ ଟିମ୍ ସିଇଓ କେଏସ୍ ବିଶ୍ୱନାଥ ଏ ନେଇ ସୂଚନା ଦେଇଛନ୍ତି। ରୈନା ବ୍ୟକ୍ତିଗତ କାରଣ ଯୋଗୁଁ ଚଳିତ ସଂସ୍କରଣର ସମସ୍ତ ମ୍ୟାଚରେ ଅନୁପସ୍ଥିତ ରହିବେ। ତେବେ ଦଳ ପକ୍ଷରୁ ରୈନା ଏବଂ ତାଙ୍କ ପରିବାର ପ୍ରତି ପୂର୍ଣ୍ଣ ସମର୍ଥନ ବ୍ୟକ୍ତ କରାଯାଇଛି।
ଗତକାଲି ଚେନ୍ନାଇ ଟିମର ଜଣେ ଖେଳାଳି ଏବଂ ସପୋର୍ଟ ଷ୍ଟାଫଙ୍କୁ ମିଶାଇ ମୋଟ ୧୨ ଜଣ କରୋନା ପଜିଟିଭ ଚିହ୍ନଟ ହୋଇଛନ୍ତି। ଏହାପରେ ସମସ୍ତ ସ୍କ୍ରୁ ମେମ୍ବରଙ୍କ ପାଇଁ ସଂଗରୋଧ ଅବଧି ବଢାଇଦିଆଯାଇଛି। ଏହି ଘଟଣାର ଦିନକ ପରେ ଏବେ ରୈନା ନଖେଳିବା ସିଏସକେ ପ୍ରଶଂସକଙ୍କୁ ନିରାଶ କରିଛି।
ସୂଚନାଯୋଗ୍ୟ, ଆଇପିଏଲ ଇତିହାସରେ ସୁରେଶ ରୈନା ସବୁଠୁ ହିଟ ଖେଳାଳି ଭାବେ ଗଣା। ୩୩ ବର୍ଷୀୟ ରୈନା ଚେନ୍ନାଇ ପାଇଁ ୧୯୩ଟି ମ୍ୟାଚ ଖେଳି ୫୦୦୦ ରୁ ଉର୍ଦ୍ଧ୍ବ ରନ ସ୍କୋର କରିଛନ୍ତି। ୨୫ ଉଇକେଟ ମଧ୍ୟ ଅକ୍ତିଆର କରିଛନ୍ତି। ନିକଟରେ ସେ ଧୋନିଙ୍କ ସହ ଅନ୍ତରାଷ୍ଟ୍ରୀୟ କ୍ରିକେଟରୁ ଅବସର ଘୋଷଣା କରିଛନ୍ତି।