ନିର୍ବାଚନ କମିଶନଙ୍କ ଜାଲିଆତିକୁ ଧରିଲେ ରାହୁଲ, କାଟିଲା ଧର୍ମେନ୍ଦ୍ରଙ୍କୁ

ଅଗଷ୍ଟ ପହିଲାରେ ନିର୍ବାଚନ କମିଶନଙ୍କ ପକ୍ଷରୁ ଜାରି କରାଯାଇଥିବା ବିହାର ଭୋଟର ତାଲିକାରେ ଯାବତୀୟ ଗଡ଼ବଡ଼ କରାଯାଇଥିବା ପ୍ରସଙ୍ଗକୁ କେନ୍ଦ୍ର କରି କଂଗ୍ରେସ ନେତା ରାହୁଲ ଗାନ୍ଧୀ ଓ ତାଙ୍କର ସହଯୋଗୀ ଦଳଗୁଡ଼ିକ ରାଜରାସ୍ତାକୁ ଓହ୍ଲାଇଛନ୍ତି । ନିର୍ବାଚନ କମିଶନ ରାହୁଲ ଗାନ୍ଧୀଙ୍କ ନିକଟରୁ ଏକ ସତ୍ୟପାଠ ଦାବି କରିଥିଲେ । ରାହୁଲ ଗାନ୍ଧୀଙ୍କ ନିକଟରୁ ସତ୍ୟପାଠ ଦାବି କରିବା ପୂର୍ବରୁ ନିର୍ବାଚନ କମିଶନ ମାନବ୍ୟର ସୁପ୍ରିମକୋର୍ଟଙ୍କ ନିକଟରେ ସଂଶୋଧିତ ଭୋଟର ତାଲିକାରେ କୌଣସି ଗଡ଼ବଡ଼ କରାଯାଇନି ବୋଲି ଏକ ସତ୍ୟପାଠ ଦାଖଲ କରିବାର ଦୁଃସାହସ ଦେଖାନ୍ତୁ ।

୨୦୨୪ ଲୋକସଭା ନିର୍ବାଚନ ପୂର୍ବରୁ ଜାରି କରାଯାଇଥିବା ବିହାର ଭୋଟର ତାଲିକା ଓ ୨୦୨୫ ଅଗଷ୍ଟ ପହିଲାରେ ଜାରି କରାଯାଇଥିବା ବିହାର ଭୋଟରକୁ ତାଳମେଳ କଲେ ପ୍ରାୟ ୪୨ ଲକ୍ଷରୁ ଅଧିକ ଭୋଟରଙ୍କ ନାମ କଟିଯାଇଛି । ବର୍ଷକ ଭିତରେ ୪୨ ଲକ୍ଷ ଭୋଟର ବିଡମ୍ବନାର ଶିକାର ହୋଇଗଲେ? ଏକ ଗଣତାନ୍ତ୍ରିକ ରାଷ୍ଟ୍ରରେ ଏପରି ଘଟଣା ଆଦୌ ମାମୁଲି ନୁହେଁ ।

ଭୋଟର ତାଲିକାରେ କୌଣସି ଜାଲିଆତି କରାଯାଇନି ବୋଲି ସତ୍ୟପାଠ ଦାଖଲ କରିବା ପାଇଁ ନିର୍ବାଚନ କମିଶନଙ୍କ ନିକଟରେ ସତ୍‌ସାହସ ଅଛି? ଆମେ ଜାଣିଛୁ, ଚୋରଙ୍କ ମୁହଁ ଟାଣ । କଂଗ୍ରେସକୁ ଯୋଉ ନେତାମାନେ ଭୋଟ ରାଜନୀତି ଅଭିଯୋଗରେ ଛନ୍ଦିବାକୁ ଉଦ୍ୟମ କରୁଛନ୍ତି । ବାସ୍ତବରେ ସେଇମାନେ ଦୁର୍ନୀତି ଓ ଭ୍ରଷ୍ଟାଚାରକୁ ଜାତୀୟ ନୀତି ଭାବେ ସ୍ୱୀକୃତି ପ୍ରଦାନ କରିଛନ୍ତି ।

ଯାହା କିଛି ଚାଲିଛି, କଂଗ୍ରେସ ଓ ନିର୍ବାଚନ କମିଶନ ଭିତରେ ଚାଲିଛି । ସେଥିରେ ବିଜେପି ନେତା ଧର୍ମେନ୍ଦ୍ର ପ୍ରଧାନ ଓକିଲାତି କରିବାର ମାନେ କ’ଣ ? ଧର୍ମେନ୍ଦ୍ରଙ୍କ ଦୃଷ୍ଟିରେ କୋଉମାନେ ଅନୁପ୍ରବେଶକାରୀ ?

ନିର୍ବାଚନ କମିଶନ ଏକ ସାମ୍ବିଧାନିକ ସଂସ୍ଥା । ତାକୁ ହାତ ବାରିସି କରିବା ଯେ କୌଣସି ଶାସକ ଦଳ ବା ମେଂଟ ପକ୍ଷେ ସମ୍ଭବ । ଅତୀତରେ କଂଗ୍ରେସ ନିର୍ବାଚନ କମିଶନକୁ ହାତ ବାରିସି କରି ବହୁତ ଫାଇଦା ହାସଲ କରିଛି । ଏବେ ବିଜେପି ମେଂଟ ନିର୍ବାଚନ କମିଶନକୁ ହାତମୁଠାରେ ରଖି ନାନା ଜାଲିଆତି କାମ କରୁଛି । ଏ କଥା ଆମେ ନୁହେଁ, ବିଜେପି ନେତା ନୀତିନ ଗଡ଼କରୀ ମଧ୍ୟ ଲୋକସଭା ନିର୍ବାଚନ ସମୟରେ ଅଭିଯୋଗ କରିଥିଲେ ।

ନୀତୀନ ଗଡ଼କରୀଙ୍କ ଅଭିଯୋଗ ମୁତାବକ ତାଙ୍କ ଭଣଜାଙ୍କ ନାମକୁ ଭୋଟର ତାଲିକାରୁ କାଟି ଦିଆଯାଇଥିଲା । ନିର୍ବାଚନ କମିଶନଙ୍କ ଦୋଷ ବାଛି ଯଦି ରାହୁଲ ଭୋଟ ବ୍ୟାଙ୍କ ରାଜନୀତି କରୁଛନ୍ତି । ତେବେ ନିର୍ବାଚନ କମିଶନଙ୍କ କାର୍ଯ୍ୟଧାରା ବିରୋଧରେ ନୀତୀନ ଗଡ଼କରୀଙ୍କ ଅଭିଯୋଗକୁ କ’ଣ କହିବେ ଧର୍ମେନ୍ଦ୍ର ପ୍ରଧାନ । ବାବୁ ଧର୍ମେନ୍ଦ୍ର ପ୍ରଧାନ । ଆଜିକାଲି ନୂଆ ନୂଆ ରିପୋର୍ଟିଂ କରୁଥିବା ଯୁବପୀଢ଼ିଙ୍କ ଆଗରେ ଆପଣ କାଉକୁ କୋଇଲି କହି ବାହାଦୁରି ଦେଖାଇ ପାରନ୍ତି । ଆମେ ଆପଣଙ୍କୁ ପିଲାଦିନରୁ ଦେଖି ଆସୁଚୁ ।