ବେଲୁଚିସ୍ତାନରେ ଆତ୍ମଘାତୀ ବିସ୍ଫୋରଣ: ୫ ପାକିସ୍ତାନୀ ସୈନିକଙ୍କ ମୃତ୍ୟୁ ହୋଇଥିବା ବାଲୁଚ୍ ଲିବରେସନ୍ ଆର୍ମିଙ୍କ ଦାବି
ରିପୋର୍ଟ ଅନୁଯାୟୀ, ବେଲୁଚିସ୍ତାନର ନୋଶକିରେ ପାକିସ୍ତାନୀ ସେନା କନଭୟରେ ଏକ ଭୟଙ୍କର ବିସ୍ଫୋରଣ ଘଟି ଅତି କମରେ ପାଞ୍ଚ ଜଣ ପାକିସ୍ତାନୀ ସୈନିକଙ୍କ ମୃତ୍ୟୁ ଘଟିଛି ଏବଂ ଦଶରୁ ଅଧିକ ଆହତ ହୋଇଛନ୍ତି ।
ବିସ୍ଫୋରଣଟି ଏକ ଆତ୍ମଘାତୀ ବିସ୍ଫୋରଣ ବୋଲି ସନ୍ଦେହ କରାଯାଉଛି ଏବଂ ମୃତାହତଙ୍କ ସଂଖ୍ୟା ବୃଦ୍ଧି ପାଇବାର ସମ୍ଭାବନା ରହିଛି । ପାକିସ୍ତାନର ବାଲୋଚିସ୍ତାନ ପ୍ରଦେଶର ବିଚ୍ଛିନ୍ନତାବାଦୀ ଗୋଷ୍ଠୀ ବାଲୁଚ୍ ଲିବରେସନ୍ ଆର୍ମି (ବିଏଲଏ ) ଏହି ଘାତକ ଆକ୍ରମଣ ପାଇଁ ଦାୟୀ ବୋଲି ଦାବି କରିଛି ଏବଂ ଏହା ମଧ୍ୟ ଦାବି କରିଛି ଯେ ଅତି କମରେ ପାଞ୍ଚ ଜଣ ପାକିସ୍ତାନୀ ସୈନିକ ନିହତ ହୋଇଛନ୍ତି । ନୋଶକି – ଡାଲବନ୍ଦିନ୍ ରାଜପଥରେ ବିସ୍ଫୋରଣ ଘଟିଥିଲା । ଆହତମାନଙ୍କୁ ନୋଶକି ହସ୍ପିଟାଲକୁ ନିଆଯାଇଥିଲା ।
“ସାତଟି ବସ୍ ଏବଂ ଦୁଇଟି କାରକୁ ନେଇ ଗଠିତ ସୁରକ୍ଷା ବାହିନୀର ଏକ କାଫଲା ଉପରେ ଆକ୍ରମଣ କରାଯାଇଥିଲା । ଏଥିରେ ୫ ଜଣଙ୍କର ମୃତ୍ୟୁ ହୋଇଛି ଏବଂ ୧୦ ରୁ ଅଧିକ ଆହତ ହୋଇଛନ୍ତି । ଗୋଟିଏ ବସ୍ ଏକ ଭେଇକିଲ୍ ବୋର୍ଣ୍ଣ ଆଇଇଡି (ଇମ୍ପ୍ରୋଭାଇଜ୍ଡ ଏକ୍ସପ୍ଲୋସିଭ୍ ଡିଭାଇସ୍) ଦ୍ୱାରା ଆଘାତ ପାଇଛି । ସମ୍ଭବତଃ ଏହା ଏକ ଆତ୍ମଘାତୀ ଆକ୍ରମଣ, ଅନ୍ୟଟି କ୍ୱେଟାରୁ ତଫତାନ୍ ଯାଉଥିବା ସମୟରେ ଏକ ରକେଟ୍ ପ୍ରୋପେଲ୍ଡ ଗ୍ରେନେଡ୍ ଦ୍ୱାରା ଟାର୍ଗେଟ କରାଯାଇଥିଲା”, ନାମ ଗୋପନ ରଖି ଜଣେ ଅଧିକାରୀ କହିଛନ୍ତି । ସୁରକ୍ଷା ବାହିନୀ ଅଞ୍ଚଳକୁ ଘେରାବନ୍ଦୀ କରି ରଖିଛନ୍ତି ଏବଂ ବିସ୍ଫୋରଣର ତଦନ୍ତ ଆରମ୍ଭ ହୋଇଛି ।