ଲଗାଣ ବର୍ଷାରେ ମୟୂରଭଞ୍ଜ ସ୍ଥିତି ବେହାଲ
ବାଙ୍ଗିରିପୋଷି ଓ ସାରସକଣାରେ ସର୍ବାଧିକ ବର୍ଷା, କାତରା ଓ ବୁଢାବଳଙ୍ଗରେ ବନ୍ୟା
ବାରିପଦା(ସାକ୍ସୀ ନ୍ୟୁଜ୍): ଚଳିତ ଲଗାଣ ଲଘୁଚାପ ବର୍ଷା ପାଇଁ ମୟୂରଭଞ୍ଜ ଜିଲ୍ଲାରେ ପରିସ୍ଥିତି ଗୁରୁତର ହୋଇପଡ଼ିଛି। ଶନିବାର ସନ୍ଧ୍ୟାରୁ ଜିଲ୍ଲାର ଅଧିକାଂଶ ଅଞ୍ଚଳରେ ବର୍ଷା ପାଇଁ କାତରା ଓ ବୁଢାବଳଙ୍ଗ ନଦୀରେ ବନ୍ୟା ଦେଖାଦେଇଛି । ବିଭିନ୍ନ ସ୍ଥାନରେ ଯୋଗାଯୋଗ ବିଛିନ୍ନ ହୋଇଥିବା ବେଳେ ପ୍ରଭାବିତ ବ୍ଲକ ଅଞ୍ଚଳରେ ଆଜି ଦିନକ ପାଇଁ ଜିଲ୍ଲାପାଳ ଛୁଟି ଘୋଷଣା କରିଛନ୍ତି । ଦୁଇଦିନ ରେଡଓ୍ଵାର୍ଣ୍ଣିଂ ପାଇଁ ଶିମିଳିପାଳ ସମେତ ଜିଲ୍ଲାର ବିଭିନ୍ନ ବ୍ଲକରେ ପ୍ରବଳବର୍ଷା ହୋଇଥିବା ବେଳେ ଆଜି ଓରେଞ୍ଜଓ୍ବାର୍ଣ୍ଣିଂ ରହିଛି ।
ଗତ ୨୪ଘଣ୍ଟାରେ ଜିଲ୍ଲାର ବାଙ୍ଗିରିପୋଷି ବ୍ଲକରେ ସର୍ବାଧିକ ୩୦୯.୨ ମିମି, ସାରସକଣାରେ ୨୯୭ ମିମି ବର୍ଷା ରେକର୍ଡ ହୋଇଛି । ଜିଲ୍ଲାର ଅନ୍ୟ ପ୍ରମୁଖ ବ୍ଲକ ମଧ୍ୟରେ ବିଶୋଇରେ ୧୯୭ ମିମି, ରାଇରଙ୍ଗପୁରରେ ୧୬୩ ମିମି, ବିଜାତଳାରେ ୧୪୦ ମିମି, ବହଳଦାରେ ୧୨୫ ମିମି, ଜାମଦାରେ ୧୧୩ ମିମି, କୁସୁମୀରେ ୧୦୪ ମିମି, କୁଳିଅଣାରେ ୯୪ ମିମି, ବାରିପଦାରେ ୮୩.୮ ମିମି ଏବଂ ଶ୍ୟାମାଖୁଣ୍ଟା ୫୬.୪ ମିମି ବର୍ଷା ରେକର୍ଡ ହୋଇଛି। ସେହିପରି ଶିମିଳିପାଳର ବଡଗାଁରେ ସର୍ବାଧିକ ୧୭୨.୭୨ ମିମି ବର୍ଷା ସହ କାବାଟଘାଇରେ ୧୩୮.୯୩୮ ମିମି, ବରେହିପାଣିରେ ୧୩୭.୪୧୪ ମିମି, ପିଠାବଟାରେ ୧୨୯.୩୮ ମିମି, ଚହଲାରେ ୧୦୨.୬ ମିମି ଏବଂ ନଓଣାରେ ୯୯.୮ ମିମି ବର୍ଷା ରେକର୍ଡ ହୋଇଛି।
ତେବେ ଏହି ବୃଷ୍ଟିପାତ ତଥ୍ୟ ଅନୁସାରେ ମୟୂରଭଞ୍ଜ ଜିଲ୍ଲାରେ ଆଗକୁ ବନ୍ୟା ପରିସ୍ଥିତି ଗମ୍ଭୀର ହେବା ନେଇ ଆଶଙ୍କା କରାଯାଇଛି । ଏହି ଅତ୍ୟଧିକ ବର୍ଷା ଫଳରେ କାତରା ଓ ବୁଢାବଳଙ୍ଗ ନଦୀର ବନ୍ୟା ଜଳ କୂଳ ଲଂଘିବାକୁ ଯାଉଛି। ସେହିପରି ଗଙ୍ଗାହାର, ଦେଓ, କାଳ, ସୋନ, ବାଉଁଶ, ଜମ୍ଭିରା ଓ ସୁବର୍ଣ୍ଣରେଖା ନଦୀରେ ମଧ୍ୟ ଜଳସ୍ତର ବଢ଼ୁଛି। ବର୍ଷା ନ ଥମିଲେ ଜିଲ୍ଲାବାସୀ ପୁଣି ଥରେ ଏକ ବଡ଼ ବନ୍ୟାର ସାମନା କରିବାକୁ ପଡ଼ିପାରେ ବୋଲି ଆଶଙ୍କା ପ୍ରକାଶ ପାଉଛି।
ଲଗାଣ ବର୍ଷା ଯୋଗୁଁ ଧାନ ସମେତ ପନିପରିବା ଚାଷରେ ବ୍ୟାପକ କ୍ଷତି ଘଟିଛି। ନିମ୍ନାଞ୍ଚଳରେ ଜଳବନ୍ଦୀ ପରିସ୍ଥିତି ସୃଷ୍ଟି ହୋଇଥିବା ବେଳେ ପ୍ରଶାସନ ପକ୍ଷରୁ ଜନସାଧାରଣଙ୍କୁ ଉଚ୍ଚସ୍ଥାନକୁ ସ୍ଥାନାନ୍ତରିତ କରାଯାଉଛି । ମାଟିକାନ୍ଥ ଘରେ କେହି ନ ରହିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି। ଜିଲ୍ଲାର ସମସ୍ତ ସରକାରୀ କର୍ମଚାରୀଙ୍କ ଛୁଟି ବାତିଲ କରାଯାଇଛି ଏବଂ ସେମାନଙ୍କୁ ପରିସ୍ଥିତି ଉପରେ ନଜର ରଖିବାକୁ କୁହାଯାଇଛି।
ଯାତାୟାତ ବ୍ୟବସ୍ଥା ମଧ୍ୟ ଗୁରୁତର ଭାବେ ପ୍ରଭାବିତ ହୋଇଛି। ୪୯ ନମ୍ବର ଜାତୀୟ ରାଜପଥର ଦୁଆରଶୁଣି ଘାଟି ରାସ୍ତା ପ୍ରବଳ ବର୍ଷା ଯୋଗୁଁ ଶୋଚନୀୟ ଅବସ୍ଥାରେ ପହଞ୍ଚିଛି। ରାସ୍ତା ସମ୍ପ୍ରସାରଣ କାର୍ଯ୍ୟ ଚାଲିଥିବା ବେଳେ ବର୍ଷା ପାଣି ରାସ୍ତା ଉପରେ ପ୍ରବାହିତ ହେବାରୁ ଯାନବାହନ ବ୍ରେକଡାଉନ୍ ହୋଇ ଦୀର୍ଘ ସମୟ ଧରି ଜାମ୍ ଲାଗି ରହିଥିଲା। ବିକଳ୍ପ ରାସ୍ତା ବିଶୋଇ-ଯୋକା-ଚନ୍ଦନପୁରରେ ମଧ୍ୟ ବର୍ଷା ଓ ବନ୍ୟା ଜଳ ପ୍ରବାହିତ ହେବାରୁ କିଛି ସମୟ ପାଇଁ ଯାନବାହନ ଚଳାଚଳ ବ୍ୟାହତ ହୋଇଥିଲା। ପ୍ରବଳ ବର୍ଷା ଓ ସମ୍ଭାବ୍ୟ ବନ୍ୟା ସ୍ଥିତି ପାଇଁ ଜିଲ୍ଲାପାଳ ବଡ଼ସାହି, ବେତନଟୀ, ବିଶୋଇ ଓ କୁଳିଅଣା ବ୍ଲକରେ ସ୍କୁଲ ଛୁଟି ଘୋଷଣା କରିଥିବା ବେଳେ ରାଇରଙ୍ଗପୁର ଉପଜିଲ୍ଲାପାଳ ବିଇଓ ମାନଙ୍କୁ ନିଜ ଅଞ୍ଚଳର ସ୍ଥିତି ଦେଖି ସ୍କୁଲ ଛୁଟି ନିର୍ଦ୍ଦେଶ ଦେଇଛନ୍ତି ।
ତେବେ ଛାତ୍ରଛାତ୍ରୀଙ୍କ ପାଇଁ ଛୁଟି ଥିଲେ ମଧ୍ୟ ସମସ୍ତ ପ୍ରଧାନଶିକ୍ଷକ ଏବଂ ସହକାରୀ ଶିକ୍ଷକ-ଶିକ୍ଷୟିତ୍ରୀମାନେ ବାଧ୍ୟତାମୂଳକ ଭାବେ ବିଦ୍ୟାଳୟରେ ଉପସ୍ଥିତ ରହିବାକୁ ପ୍ରଶାସନ ସ୍ପଷ୍ଟ ନିର୍ଦ୍ଦେଶ ଦେଇଛି। ସମ୍ଭାବ୍ୟ ଜରୁରୀକାଳୀନ ପରିସ୍ଥିତିରେ ବିଦ୍ୟାଳୟ କୋଠାଗୁଡ଼ିକୁ ଅସ୍ଥାୟୀ ବନ୍ୟା ଆଶ୍ରୟସ୍ଥଳୀ ଭାବେ ବ୍ୟବହାର କରାଯିବାକୁ କୁହାଯାଇଛି । ବଡ଼ସାହି ବ୍ଲକର ୩୮ଟି ନିର୍ଦ୍ଦିଷ୍ଟ ବିଦ୍ୟାଳୟର ପ୍ରଧାନଶିକ୍ଷକ ମାନଙ୍କୁ ସମ୍ପୂର୍ଣ୍ଣ ସଜାଗ ଓ ସତର୍କ ରହିବାକୁ ଆଲର୍ଟ କରାଯାଇଛି l ବ୍ଲକ ପ୍ରଶାସନ ପକ୍ଷରୁ ବିଭିନ୍ନ ପଞ୍ଚାୟତରେ ନୋଡାଲ ଅଧିକାରୀଙ୍କୁ ଦାୟିତ୍ୱ ନ୍ୟସ୍ତ କରାଯାଇ ରିଲିଫ୍, ଥଇଥାନ ଓ ପାନୀୟ ଜଳ ବ୍ୟବସ୍ଥା ତଦାରଖ ପାଇଁ ସ୍ୱତନ୍ତ୍ର ପଦକ୍ଷେପ ଗ୍ରହଣ କରାଯାଇଛି।
ଅନ୍ୟପଟେ ଜିଲ୍ଲାରେ ବନ୍ୟା ପରିସ୍ଥିତି କ୍ରମଶଃ ଗମ୍ଭୀର ହେବାରେ ଲାଗିଛି। ପୋଡ଼ାଅସ୍ତିଆ ଠାରେ ବୁଢ଼ାବଳଙ୍ଗ ନଦୀର ଜଳସ୍ତର ବିପଦ ସଙ୍କେତ ଛୁଇଁଥିବା ବେଳେ ମାଣତ୍ରୀ- ବୈଶିଙ୍ଗା ରାସ୍ତାର ନାଖରା ପୋଲ ଉପରେ ବନ୍ୟା ଜଳ ପ୍ରବାହିତ ହେଉଛି। ଏହାସହ ବେଲପାଳ ଓ ଘୁଷୁରିଆ ଠାରେ ପାଣି ଚାଲିବାରୁ ବଡ଼ସାହି- ବେତନଟୀ ମଧ୍ୟରେ ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇପଡ଼ିଛି। ପ୍ରଶାସନ ପକ୍ଷରୁ ପରିସ୍ଥିତି ଉପରେ ନିରନ୍ତର ନଜର ରଖାଯାଉଛି ଏବଂ ଆବଶ୍ୟକ ସ୍ଥାନରେ ଉଦ୍ଧାର କାର୍ଯ୍ୟ ଜାରି ରଖାଯାଇଛି। ଜିଲ୍ଲାବାସୀଙ୍କୁ ସତର୍କ ରହିବା ସହିତ ପ୍ରଶାସନିକ ନିର୍ଦ୍ଦେଶ ଅନୁସରଣ କରିବାକୁ ପରାମର୍ଶ ଦିଆଯାଇଛି।