କେନ୍ଦୁଝର ଜିଲ୍ଲା ତୁରୁମୁଙ୍ଗା ଥାନାରେ ରୁଜୁ ହୋଇଥିବା ଏକ ଧର୍ଷଣ ମାମଲାରେ ଅଦାଲତ ଅଭିଯୁକ୍ତ ବାବୁଲି ବେହେରାଙ୍କୁ ଦୋଷୀ ସାବ୍ୟସ୍ତ କରି ୧୦ ବର୍ଷ କଠୋର କାରାଦଣ୍ଡ ସହ ୫ ହଜାର ଟଙ୍କା ଜରିମାନା ଦଣ୍ଡାଦେଶ ଶୁଣାଇଛନ୍ତି। ସୂଚନା ଅନୁଯାୟୀ, ତୁରୁମୁଙ୍ଗା ଥାନା କେସ୍ ନଂ-୧୫୩/୨୦୨୫ର ଶୁଣାଣି ପରେ ଅଦାଲତ ଏହି ରାୟ ପ୍ରକାଶ କରିଛନ୍ତି। ଦୋଷୀ ବାବୁଲି ବେହେରା ତୁରୁମୁଙ୍ଗା ଅଞ୍ଚଳର କଣ୍ଟିଆପଡା ଗ୍ରାମର ବାସିନ୍ଦା ବୋଲି ଜଣାପଡ଼ିଛି। ମାମଲାର ତଦନ୍ତ ଇନ୍ସପେକ୍ଟର ଦୀପ୍ତି ରଞ୍ଜନ ସାହୁ କରିଥିବା ବେଳେ ସରକାରୀ ଅଭିଯୋଜକ ଶ୍ରୀ ପି. ନାଥ ଅଦାଲତରେ ମାମଲା ପରିଚାଳନା କରିଥିଲେ। ତଦନ୍ତକାରୀ ଅଧିକାରୀଙ୍କ ଦ୍ୱାରା ସଂଗୃହୀତ ପ୍ରମାଣ ଓ ସାକ୍ଷ୍ୟ ଆଧାରରେ ଅଦାଲତ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରି ଏହି ଦଣ୍ଡାଦେଶ ପ୍ରଦାନ କରିଛନ୍ତି। କେନ୍ଦୁଝର ପୁଲିସ ପକ୍ଷରୁ ଏହାକୁ ଏକ ସଫଳ ତଦନ୍ତ ଓ ଆଇନଗତ ପ୍ରକ୍ରିୟାର ପରିଣାମ ବୋଲି କୁହାଯାଇଛି। ଏହି ରାୟ ମହିଳା ଓ ଶିଶୁଙ୍କ ବିରୋଧରେ ଘଟୁଥିବା ଅପରାଧ ପ୍ରତି କଡ଼ା ବାର୍ତ୍ତା ଦେବା ସହ ଆଇନ ପ୍ରତି ଜନସାଧାରଣଙ୍କ ବିଶ୍ୱାସକୁ ଆହୁରି ସୁଦୃଢ଼ କରିବ ବୋଲି ମତ ପ୍ରକାଶ ପାଇଛି
