ଡାଏନକ୍ସ ବାର୍ ନିକଟରେ ଠିଆ ହୋଇଥିବା ଜଣେ ଯୁବକଙ୍କୁ ୩ ଜଣ ଦୁର୍ବୃତ୍ତ ଅତର୍କିତ ଭାବେ ଆସି ଖଣ୍ଡା, ଭୂଜାଲିରେ ତାଙ୍କୁ ଗୋଡେଇ ଗୋଡେଇ ହାଣିଥିଲେ। ଗୁରୁତର ଅବସ୍ଥାରେ ତାଙ୍କୁ ରାଜଧାନୀର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା। ଆକ୍ରମଣ ଘଟଣାରେ ସହିଦନଗର ଥାନା ପୁଲିସ ୩ ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତମାନେ ହେଲେ ସହିଦନଗର ଥାନା ନିକଟସ୍ଥ ରେସିଡେନ୍ସ ପ୍ଳଟ ନମ୍ବର ୭୫୪ରେ ରହୁଥିବା ଦୁର୍ଯ୍ୟାଧନ ବାରିକ(୨୫), ଶାନ୍ତିପଲ୍ଲୀ ବସ୍ତିର ସବ୍ୟସାଚୀ ବିଶ୍ୱାଳ(୨୫) ଓ ଗଞ୍ଜାମର ଜି ଲିଟୁ ପ୍ରଧାନ(୨୭)। ସମସ୍ତଙ୍କୁ ସୋମବାର ଦିନ କୋର୍ଟ ଚାଲାଣ କରାଯାଇଛି ।
ଅଭିଯୋଗକାରୀ ଗୁରୁଦେବ ମିଶ୍ରଙ୍କ ଲିଖିତ ରିପୋର୍ଟ ଆଧାରରେ ଏକ ମାମଲା ରୁଜୁ କରାଯାଇ ତଦନ୍ତ ଆରମ୍ଭ କରାଯାଇଥିଲା। ସୂଚନାଯୋଗ୍ୟ ଯେ, ତା ୦୭.୧୨.୨୦୨୫ ରାତି ସମୟରେ ଅଭିଯୋଗକାରୀ ଏବଂ ତାଙ୍କ ସହଯୋଗୀମାନେ ଡାଏନକ୍ସ ବାର୍ ନିକଟରେ ଥିବାବେଳେ ଅଭିଯୁକ୍ତମାନେ ସେଠାରେ ପହଞ୍ଚିଥିଲେ। ପୂର୍ବ ବିବାଦର ପରିପେକ୍ଷରେ ସେମାନଙ୍କ ମଧ୍ୟରେ ପ୍ରଥମେ ହଟ୍ଟଗୋଳ ସୃଷ୍ଟି ହୋଇଥିଲା । ଯାହା ପରେ ଉଗ୍ର ରୂପ ଧାରଣ କରିଥିଲା। ଏହି ସମୟରେ ଅଭିଯୁକ୍ତମାନେ ଅଭିଯୋଗକାରୀଙ୍କୁ ପେଭର ବ୍ଲକ, ବାଉଁଶ ଏବଂ ଖଣ୍ଡା ସାହାଯ୍ୟରେ ଆକ୍ରମଣ କରିଥିଲେ, ଯାହା ଫଳରେ ତାଙ୍କ ମୁଣ୍ଡ ଏବଂ ଶରୀରର ଅନ୍ୟାନ୍ୟ ଅଂଶରେ ପ୍ରବଳ ରକ୍ତସ୍ରାବ ହୋଇଥିଲା। ସେମାନେ ଅଭିଯୋଗକାରୀଙ୍କୁ ଅଶ୍ଳୀଳ ଭାଷାରେ ଗାଳି ଦେଇଥିଲେ ଏବଂ ପଳାଇବା ପୂର୍ବରୁ ତାଙ୍କୁ ଗୁରୁତର ପରିଣାମ ଦେବାକୁ ଧମକ ମଧ୍ୟ ଦେଇଥିଲେ। ତଦନ୍ତ ସମୟରେ, ଅଭିଯୁକ୍ତ ଜି. ଲିଟୁ ପ୍ରଧାନଙ୍କ ନିକଟରୁ ଅପରାଧରେ ବ୍ୟବହୃତ ଏକ ଗାଡ଼ି ଜବତ କରାଯାଇଥିଲା। ଅଭିଯୁକ୍ତ ଦୁର୍ଯ୍ୟାଧନ ବାରିକ ଓରଫ ଧନାଙ୍କ ନିକଟରୁ ଅପରାଧର ଅସ୍ତ୍ର ଏକ ଖଣ୍ଡା ଜବତ କରାଯାଇଥିଲା। ପଚରାଉଚରା ସମୟରେ ଗିରଫ ହୋଇଥିବା ସମସ୍ତ ଅଭିଯୁକ୍ତ ସ୍ୱଇକାକୃତ ଭାବରେ ଅପରାଧରେ ସେମାନଙ୍କ ସଂପୃକ୍ତି ସ୍ୱୀକାର କରିଥିଲେ। ଯାଞ୍ଚରୁ ଜଣାପଡିଛି ଯେ ଅଭିଯୁକ୍ତ ବ୍ୟକ୍ତିମାନେ ବହୁ ଅପରାଧିକ ମାମଲାରେ ଜଡିତ ଏବଂ ଏବଂ ଅଭ୍ୟାସଗତ ଅପରାଧୀ ଭାବେ ସେମାନଙ୍କ ବିରୁଦ୍ଧରେ ହିଂସା, ସାର୍ବଜନୀନ ଉପଦ୍ରବ ଏବଂ ଭୟଭୀତ କରିବା ଆଦି କାର୍ଯ୍ୟରେ ଲିପ୍ତ ଥିବା ତଥ୍ୟ ମିଳିଛି, ଯାହା ଫଳରେ ସ୍ଥାନୀୟ ଲୋକଙ୍କ ମଧ୍ୟରେ ଭୟ ଚାପ ସୃଷ୍ଟି ହୋଇଆସିଛି। ଉପଲବ୍ଧ ପ୍ରାଥମିକ ପ୍ରମାଣ ଆଧାରରେ ଆଜି ସମସ୍ତ ଆଇନଗତ ଔପଚାରିକତା ପାଳନ କରି ଅଭିଯୁକ୍ତମାନଙ୍କୁ କୋର୍ଟଚାଲାଣ କରାଯାଇଛି। ଅପରାଧରେ ଜଡିତ ଅନ୍ୟ ଅଭିଯୁକ୍ତ ବ୍ୟକ୍ତିମାନଙ୍କୁ ଗିରଫ କରିବା ପାଇଁ ଏହି ମାମଲାର ଅଧିକ ତଦନ୍ତ ଜାରି ରହିଛି।