ମୁମ୍ବାଇ: ବଲିଉଡ଼ର ଡ୍ରଗ୍ ଲିଙ୍କ ନେଇ ଅଭିନେତ୍ରୀ କଙ୍ଗନା ରାଣାୱତ ଗତ କିଛି ଦିନ ହେଲା ଟ୍ୱିଟରରେ ଝଡ଼ ସୃଷ୍ଟି କରିଚାଲିଛନ୍ତି। ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ମାମଲାରେ ଡ୍ରଗ୍ସ କଥା ଉଠିବା ପରେ ବେଶ ଆକ୍ରମଣାତ୍ମକ ଭଙ୍ଗୀ ଆପଣେଇଛନ୍ତି କଙ୍ଗନା। ଏପରିକି ବ୍ୟକ୍ତିଗତ ନାଁ ନେଇ ସେ ଜଣଙ୍କ ପରେ ଜଣେ ଅଭିନେତା, ପ୍ରଯୋଜକ, ନିର୍ଦ୍ଦେଶକଙ୍କ ଉପରେ ଆକ୍ଷେପ ଲଗାଇବାକୁ ପଛାଉନାହାନ୍ତି। ଆଜି ସେ ଆଉ ଏକ ବିସ୍ଫୋରଣ କରିଛନ୍ତି।
ଇଣ୍ଡଷ୍ଟ୍ରିର ଦୁଇ ଆଗଧାଡ଼ିର ଅଭିନେତା ରଣବୀର ସିଂ ଏବଂ ରଣବୀର କପୁରଙ୍କୁ ଏବେ କଙ୍ଗନାଙ୍କ ଡ୍ରଗ୍ସ ସହ ଯୋଡ଼ିଛନ୍ତି। ସେ ଆଜି ଟ୍ବିଟ୍ କରିଛନ୍ତି ଯେ, ମୁଁ ରଣବୀର ସିଂ, ରଣବୀର କପୁର, ଆୟାନ ମୁଖର୍ଜୀ, ଭିକି କୌଶିକଙ୍କୁ ଅନୁରୋଧ କରୁଛି ସେମାନେ ଡ୍ରଗ୍ ଟେଷ୍ଟ ପାଇଁ ନିଜର ରକ୍ତ ନମୂନା ଦିଅନ୍ତୁ। ଏଠାରେ ଗୁଜବ ଉଡ଼ୁଛି ଯେ ଏମାନେ କୋକେନ୍ ନିଶାଖୋର। ମୁଁ ଚାହୁଁଛି ସେମାନେ ଏହି ଗୁଜବର ପର୍ଦ୍ଦାଫାଶ କରନ୍ତୁ। ଯଦି ସେମାନଙ୍କ ନମୂନା ସ୍ୱଚ୍ଛ ଆସୁଛି ତେବେ ଏହି ଯୁବକ ମାନେ ଅନେକଙ୍କୁ ପ୍ରେରଣା ଦେବେ।
ସୂଚନାଯୋଗ୍ୟ, ପୂର୍ବରୁ କଙ୍ଗନା ବଲିଉଡ଼ର ବିଭିନ୍ନ ହାଉସ ପାର୍ଟିରେ କୋକେନର ବହୁଳ ବ୍ୟବହାର ହେଉଥିବା ଜଣାଇଛନ୍ତି। ଏବଂ ଏନେଇ ତଦନ୍ତ କରାଗଲେ ସେ ନିଶା ନିୟନ୍ତ୍ରଣ ସଂସ୍ଥାକୁ ସମସ୍ତ ସହଯୋଗ କରିବେ ବୋଲି କହିଥିଲେ।