ପ୍ରଥମ ବିଶ୍ବ ଗଣମାଧ୍ୟମ କଂଗ୍ରେସରେ ଉଦବୋଧନ ଦେଲେ ସୂଚନା ଓ ପ୍ରସାରଣ ସଚିବ ଶ୍ରୀ ଅପୂର୍ବ ଚନ୍ଦ୍ର

କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ସଚିବ ଶ୍ରୀ ଅୂପୂର୍ବ ଚନ୍ଦ୍ର ବୁଧବାର ଦିନ କହିଛନ୍ତି ଯେ, ଭାରତରେ ୧୨୦ କୋଟି ମୋବାଇଲ ଫୋନ ବ୍ୟବହାରକାରୀ ଏବଂ ୬୦କୋଟି ସ୍ମାର୍ଟଫୋନ୍‌ ବ୍ୟବହାରକାରୀ ରହିଛନ୍ତି । ଇଣ୍ଟରନେଟ ଡାଟା ଦର କମ ଥିବା କାରଣରୁ ଉପଭୋକ୍ତା ବା ୟୁଜରମାନେ ମୋବାଇଲ ଫୋନ ଡିଭାଇସ ମାଧ୍ୟମରେ ଅଧିକ ପରିମାଣରେ ସୂଚନା ଏବଂ ମନୋରଞ୍ଜନ ସେବା ଉପଭୋଗ କରୁଛନ୍ତି । ସାମାଜିକ ଗଣମାଧ୍ୟମ କାରଣରୁ ଭାରତରେ ଲୋକଙ୍କ ନିକଟରେ ଅଧିକ ଦ୍ରୁତ ଗତିରେ ଏବଂ ଗଭୀର ଭାବେ ସୂଚନା ପହଞ୍ଚି ପାରୁଛି । ଏହାର ପ୍ରଭାବ ଏପରିକି ପ୍ରାକୃତିକ ଦୁର୍ବିପାକରେ ଜୀବନହାନିକୁ ହ୍ରାସ କରିପାରିଛି । ସଂଯୁକ୍ତ ଆରବ ଅମୀରତନ୍ତ୍ର (ୟୁଏଇ)ର ଆବୁଧାବି ଠାରେ ଆୟୋଜିତ ପ୍ରଥମ ବିଶ୍ବ ଗଣମାଧ୍ୟମ କଂଗ୍ରେସକୁ ସମ୍ବୋଧିତ କରି ସଚିବ ଶ୍ରୀ ଚନ୍ଦ୍ର ଏହା କହିଛନ୍ତି ।

ପ୍ରଥମ ବିଶ୍ବ ଗଣମାଧ୍ୟମ କଂଗ୍ରେସ ଆୟୋଜନ କରୁଥିବା କାରଣରୁ ସଚିବ ଶ୍ରୀ ଚନ୍ଦ୍ର ସଂଯୁକ୍ତ ଆରବ ଅମୀରତନ୍ତ୍ର ସରକାରଙ୍କୁ ପ୍ରଶଂସା କରିଥିଲେ । ଆୟୋଜକ ଦେଶ ସହିତ ଭାରତର ଅନେକ ସମାନତା ରହିଛି ବୋଲି ସେ କହିଥିଲେ । ଭାରତରେ ଗଣମାଧ୍ୟମ ପରିଦୃଶ୍ୟ ସମ୍ପର୍କରେ ଉପସ୍ଥିତ ଶ୍ରୋତାମାନଙ୍କୁ ସଚିବ ଶ୍ରୀ ଚନ୍ଦ୍ର ସୂଚନା ଦେଇଥିଲେ । ସେ କହିଥିଲେ ଯେ ଭାରତ ପାରମ୍ପରିକ ଗଣମାଧ୍ୟମ ଥିବା ଏକ ଦେଶ । ଭାରତରେ ବିଭିନ୍ନ ଭାଷାରେ ୮୯୭ରୁ ଅଧିକ ଟିଭି ଚାନେଲ, ୩୫୦ରୁ ଅଧିକ ନ୍ୟୁଜ୍‌ ଚାନେଲ, ୮୦ ହଜାରରୁ ଅଧିକ ସମ୍ବାଦପତ୍ର ପ୍ରକାଶିତ ଓ ପ୍ରସାରିତ ହେଉଛି । ତେବେ ସମ୍ପ୍ରତି ନ୍ୟୁ ମିଡିଆ ଏବଂ ନୂଆ ପିଢ଼ିର ଗଣମାଧ୍ୟମ ପ୍ରତି ଯୁବପିଢ଼ି ଅଧିକ ଆକୃଷ୍ଟ ହେବା ସହିତ ଏଥିରୁ ସୂଚନା ସଂଗ୍ରହ କରୁଛନ୍ତି । ସଚିବ ଶ୍ରୀ ଚନ୍ଦ୍ର କହିଥିଲେ ଯେ ଏହି ନୂଆ ଗଣମାଧ୍ୟମ ବିଶ୍ବସନୀୟତା ପ୍ରତି ଆହ୍ବାନ ସୃଷ୍ଟି କରିବା ସହିତ ସରକାରଙ୍କ ପାଇଁ ମଧ୍ୟ ସମସ୍ୟା ଛିଡ଼ା କରିଛି ।

ସେ ଆହୁରି କହିଥିଲେ ଯେ ସରକାର ଏହି ଧାରା ଉପରେ ନିୟନ୍ତ୍ରଣ କରିବା ଲାଗି ଉପାୟ କରିବା ଆବଶ୍ୟକ ଥିଲା । ଭାରତ ଏ କ୍ଷେତ୍ରରେ ଏକ ସ୍ବନିୟନ୍ତ୍ରିତ ନିୟାମକ ବ୍ୟବସ୍ଥା ନେଇ ଆଗକୁ ଆସିଛି । ପ୍ରଥମ ସ୍ତରର ଅଭିଯୋଗର ସମାଧାନ ସାମାଜିକ ଗଣମାଧ୍ୟମ ସଂଗଠନ ସ୍ତରରେ କରାଯିବାକୁ ଏଥିରେ ସୁନିଶ୍ଚିତ କରାଯାଇଛି ।