ମୁମ୍ବାଇ: ‘ଗୋଲମାଲ’,‘ ଜବ ଉଇ ମେଟ’, ଓ ‘ବୋଲ ବଚ୍ଚନ’ ପରି ସୁପରହିଟ୍ ଫିଲ୍ମର ପ୍ରଡ୍ୟୁସର ରାଜୁ ଶାହ ଆଉ ନାହାନ୍ତି। ଗତକାଲି ବିଳମ୍ବିତ ରାତିରେ ହୃଦଘାତରେ ତାଙ୍କ ମୃତ୍ୟୁ ହୋଇଛି।
ପତ୍ନୀଙ୍କ ସହ ଛୁଟି କାଟିବାକୁ କଶ୍ମୀର ଯାଇଥିବା ବେଳେ ସେଠାରେ ଆଖି ବୁଜିଛନ୍ତି ରାଜୁ ଶାହ। ମୃତ୍ୟୁ ବେଳକୁ ତାଙ୍କୁ ୬୩ ବର୍ଷ ହୋଇଥିଲା। ଗତକାଲି ବିଳମ୍ବିତ ରାତିରେ ରାଜୁଙ୍କ ଛାତିରେ ଯନ୍ତ୍ରଣା ହୋଇଥିଲା। ଏହାପରେ ତାଙ୍କୁ ସଙ୍ଗେ ସଙ୍ଗେ ହସ୍ପିଟାଲ ନିଆଯାଇଥିବା ବେଳେ ସେଠାରେ ସେ ଆଖି ବୁଜିଛନ୍ତି।
ଏହି ଖବରକୁ ରାଜୁଙ୍କ ପୁଅ, ଝିଅ ଓ ଜ୍ୱାଇଁ ପ୍ରଥମେ ବିଶ୍ୱାସ କରି ପାରି ନ ଥିଲେ। ଆଜି ସକାଳେ ସେମାନେ କଶ୍ମୀରରେ ପହଞ୍ଚି ସେଠାରୁ ତାଙ୍କ ମୃତଦେହ ମୁମ୍ବାଇ ଅଭିମୁଖେ ଆଣୁଥିବା ଜଣାଯାଇଛି। ବାପାଙ୍କ ମୃତ୍ୟର ୪୫ ମିନିଟ୍ ପୂର୍ବରୁ ମୁଁ ତାଙ୍କ ସହ କଥା ହୋଇଥିଲି। ସେ ପୂରା ଭଲ ଥିଲେ। ହେଲେ ଅଚାନକ ଏପରି ଖବର ପାଇ ପରିବାରର ସମସ୍ତଙ୍କୁ ଶକ୍ତ ଧକ୍କା ଲାଗିଥିବା ସେ କହିଛନ୍ତି।
ଏହି ଖବର ପ୍ରଚାରିତ ହେବା ପରେ ବହୁ ବଲିଉଡ ସେଲିବ୍ରିଟି ଶୋକ ପ୍ରକାଶ କରିଛନ୍ତି। ରାଜୁ ଶାହଙ୍କର TA Shah ନାମକ ଗ୍ରୁପ ଅଫ୍ କମ୍ପାନୀ ଥିବା ବେଳେ Sona ସିନେମାର ବି ସେ ମାଲିକ ଥିଲେ । ହେଲେ ପରେ ସେ Sona ସିନେମାକୁ ବିକ୍ରି କରି ଦେଇଥିଲେ।