ଏଜବେଷ୍ଟନ ଟେଷ୍ଟରେ ଭାରତୀୟ ଦର୍ଶକଙ୍କୁ ଦୁର୍ବ୍ୟବହାର ମାମଲାରେ ଜଣେ ଗିରଫ

ନୂଆଦିଲ୍ଲୀ : ଭାରତୀୟ ଦଳ ନିକଟରେ ଇଂଲଣ୍ଡ ବିପକ୍ଷରେ ଏଜବେଷ୍ଟନ ଟେଷ୍ଟ ଖେଳିଥିଲା । ଏଥିରେ ଭାରତ ୭ ୱିକେଟରେ ପରାସ୍ତ ହୋଇଥିଲା । ତେବେ ଦର୍ଶକ ଗ୍ୟାଲେରୀରେ ଭାରତୀୟ ଦର୍ଶକଙ୍କୁ ଇଂଲଣ୍ଡର କିଛି ଫ୍ୟାନ ଦୁର୍ବ୍ୟବହାର କରିଥିଲେ । ଭାରତୀୟ ଦର୍ଶକଙ୍କୁ ଗାଳି କରିବା ସହ ପାକିସ୍ତାନୀ ମଧ୍ୟ କହିଥିଲେ । ମାମଲାକୁ ଗୁରୁତର ସହ ନେଇ ଇଂଲଣ୍ଡ କ୍ରିକେଟ ବୋର୍ଡ ତଦନ୍ତ ଆରମ୍ଭ କରିଥିଲା ।

ଦୁର୍ବ୍ୟବହାର ପ୍ରଦର୍ଶନ କରିଥିବା ଇଂଲଣ୍ଡ ପ୍ରଶଂସକଙ୍କ ମଧ୍ୟରୁ ଜଣଙ୍କୁ ବର୍ମିଂହାମ ପୋଲିସ ଗିରଫ କରିଥିବା ଜଣାପଡିଛି । ତଦନ୍ତରେ ଏହି ମାମଲାରେ ଅନେକ ଖୁଲାସା ହେବ ବୋଲି ପୋଲିସ କହିଛି । ବ୍ୟକ୍ତିଜଣଙ୍କ ବର୍ଣ୍ଣବୈଷମ୍ୟ ନେଇ କମେଣ୍ଟ କରିଥିଲେ ।

ସୂଚନାଯୋଗ୍ୟ, ଶେଷ ଟେଷ୍ଟର ଚତୁର୍ଥ ଦିନରେ ଟ୍ୱିଟରରେ ଭାରତୀୟ ଫ୍ୟାନ ଅନେକ ଅଭିଯୋଗ କରିଥିଲେ । ଯାହାକୁ ନେଇ ତଦନ୍ତ ସହ କାର୍ଯ୍ୟାନୁଷ୍ଠାନ ପାଇଁ ଇଂଲଣ୍ଡ ବୋର୍ଡ ନିକଟରେ ଦାବି କରାଯାଇଥିଲା । ଇଂଲଣ୍ଡ ବୋର୍ଡ ମଧ୍ୟ ଘଟଣାକୁ ନିନ୍ଦା କରିବା ସହ ତଦନ୍ତ ଆରମ୍ଭ କରିଥିଲା ।