ନୂଆଦିଲ୍ଲୀ: ଦେଶର ୧୩୦ କୋଟି ଜନସଂଖ୍ୟା ମଧ୍ୟରୁ ୨୫ କୋଟି ଲୋକଙ୍କୁ ୨୦୨୧ ଜୁଲାଇ ସୁଦ୍ଧା ସରକାର ଦେବେ କୋଭିଡ୍ ଟିକା। ଏଥିପାଇଁ ୪୦୦ରୁ ୫୦୦ ନିୟୁତ ଟିକା ଡୋଜ୍ ଗ୍ରହଣ କରିବେ ସରକାର। ଏହାର ସମାନ ବଣ୍ଟନ କରାଇବେ ବୋଲି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରୀ ହର୍ଷବର୍ଦ୍ଧନ ଆଜି କହିଛନ୍ତି।
କରୋନା ଲଢ଼େଇରେ ଆଗଧାଡ଼ିରେ ରହି ସେବା ଥିବା ସ୍ବାସ୍ଥ୍ୟକର୍ମୀ (ଉଭୟ ସରକାରୀ ଏବଂ ଘରୋଇ କର୍ମଚାରୀ) ଅକ୍ଟୋବର ଶେଷ ସୁଦ୍ଧା ପ୍ରଥମେ ଟିକା ପାଇବେ। କେନ୍ଦ୍ରୀୟ ସ୍ତରରେ ଟିକା କ୍ରୟ କରାଯାଉଛି ଏବଂ ପ୍ରତି କାର୍ଯ୍ୟକୁ ସଠିକ୍ ସମୟରେ ଟ୍ରାକ୍ କରାଯିବ। ତେବେ ସ୍ବାସ୍ଥ୍ୟକର୍ମୀ ଏବଂ ବୟସ୍କଙ୍କୁ ପ୍ରଥମେ ପ୍ରାଧାନ୍ୟ ଦିଆଯିବ ବୋଲି ହର୍ଷବର୍ଦ୍ଧନ କହିଛନ୍ତି। ସେଥିପାଇଁ କେଉଁମାନଙ୍କୁ ପ୍ରଥମେ ଟିକା ମିଳିବ ତା’ର ଏକ ବିବରଣୀ ପଠାଇବା ପାଇଁ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳମାନଙ୍କୁ ନିର୍ଦ୍ଦେଶ ଦିଆଯାଇଛି ବୋଲି ସ୍ବାସ୍ଥ୍ୟ ମନ୍ତ୍ରୀ କହିଛନ୍ତି।
ତେବେ ଟିକା ପ୍ରସ୍ତୁତକର୍ତ୍ତାଙ୍କୁ ପୂର୍ଣ୍ଣ ସମର୍ଥନ ପ୍ରଦାନ କରୁଥିବା ବେଳେ ଟିକାର ବଣ୍ଟନ ପାଇଁ ସମସ୍ତ ପଦକ୍ଷେପ ନେବାପାଇଁ ସରକାର ପ୍ରତିଶ୍ରୁତିବଦ୍ଧ ବୋଲି ସେ କହିଛନ୍ତି। ସେହିପରି ଟିକାର ଯେଭଳି ସଠିକ୍ ବଣ୍ଟନ ହୋଇପାରିବ ଏବଂ ସମସ୍ତ କାର୍ଯ୍ୟ ସଠିକ ପରିଚାଳନା ହେବ ଏଥିପାଇଁ ସରକାର ଏକ ଉଚ୍ଚସ୍ତରୀୟ କମିଟି ଗଠନ କରିଛନ୍ତି ବୋଲି ହର୍ଷବର୍ଦ୍ଧନ କହିଛନ୍ତି।