ନୂଆଦିଲ୍ଲୀ : ଏଣିକି ଦେଶର ଯେକୌଣସି ବ୍ୟକ୍ତି ଜମ୍ମୁ-କାଶ୍ମୀରର ମୁନିସିପାଲଟି ଓ ସହରାଞ୍ଚଳରେ ଜମି କିଣିପାରିବେ । ଜମି କିଣିବା ପାଇଁ କୌଣସି ରାଜ୍ୟ ବାସିନ୍ଦା ପତ୍ର ଦରକାର ନାହିଁ । ଜାମ୍ମୁ-କାଶ୍ମୀରରେ ଯେକୌଣସି ରାଜ୍ୟର ଲୋକେ ଜମି କିଣିପାରିବେ । ଜାମ୍ମୁ-କାଶ୍ମୀରରେ ଶିଳ୍ପକୁ ପ୍ରୋତ୍ସାହନ ପାଇଁ ନିଷ୍ପତ୍ତି ନିଆଯାଇଛି ।
ଏନେଇ ମଙ୍ଗଳବାର ଗୃହ ମନ୍ତ୍ରଣାଳୟ ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଛି। ଏହି ବିଜ୍ଞପ୍ତି ଅନୁସାରେ ଦେଶର ଯେକୌଣସି ବ୍ୟକ୍ତି ଜମ୍ମୁ-କାଶ୍ମୀର ଏବଂ ଲଦାଖରେ ଜମି କିଣିପାରିବେ ଏବଂ ସେଠାରେ ବସବାସ କରିପାରିବ କିନ୍ତୁ ଚାଷ ଜମି ବିକ୍ରି କରାଯାଇ ପାରିବ ନାହିଁ।ଗୃହ ମନ୍ତ୍ରଣାଳୟ ଦ୍ବାରା ଜାରି କରାଯାଇଥିବା ବିଜ୍ଞପ୍ତିରେ କୁହାଯାଇଛି ଯେ ଏହି ଆଦେଶକୁ ଜାମ୍ମୁ କାଶ୍ମୀର ପୁନର୍ଗଠନ (କେନ୍ଦ୍ରୀୟ ଆଇନଗୁଡ଼ିକର ଅନୁପାଳନ) ତୃତୀୟ ଆଦେଶ- ୨୦୨୦ କୁହାଯିବ।ଏଥି ସହିତ ଏହି ଆଦେଶକୁ ତୁରନ୍ତ ଲାଗୁ କରାଯାଇଛି।
ସେପଟେ ଏହି ନିୟମ ଲାଗୁ ପରେ ଜାମ୍ମୁ କାଶ୍ମୀରର ରାଜ୍ୟପାଳ ମନୋଜ ସିହ୍ନା କହିଛନ୍ତି ଯେ ଜମ୍ମୁ-କାଶ୍ମୀରରେ ଶିଳ୍ପ ପ୍ରତିଷ୍ଠା ପାଇଁ ଏହି ନିୟମ ସହାୟକ ହେବ। ଜମ୍ମୁ-କାଶ୍ମୀରରେ ବାହ୍ୟ ଶିଳ୍ପ ପ୍ରତିଷ୍ଠା କରାଗଲେ ଏଠାକାର ଯୁବକ ନିଯୁକ୍ତି ପାଇବେ। ତେଣୁ ରାଜ୍ୟବାସୀଙ୍କ ପାଖରେ ଚାଷ ଜମିକୁ ରଖି ଶିଳ୍ପ ଜମିର ବିନିଯୋଗ କରିବାର ଆବଶ୍ୟକତା ରହିଛି।
ପୂର୍ବରୁ ଜମ୍ମୁ କାଶ୍ମୀରରେ କେବଳ ସେଠାକାର ବାସିନ୍ଦା ହିଁ ଜମି କ୍ରୟ କରିପାରୁଥିଲେ କିନ୍ତୁ ବର୍ତ୍ତମାନ ବାହାର ରାଜ୍ୟର ଲୋକେ ମଧ୍ୟ ଜମି କିଣି ସେଠାରେ କାମ ଆରମ୍ଭ କରିପାରିବେ । ଜମ୍ମୁ କାଶ୍ମୀର ପୁନର୍ଗଠନ ଅଧିନିୟମ ଅନୁଯାୟୀ କେନ୍ଦ୍ର ଗୃହ ମନ୍ତ୍ରଣାଳୟ ଏହି ନିଷ୍ପତ୍ତି ନେଇଛି । ଏଥିରେ କୌଣସି ଭାରତୀୟ ବର୍ତ୍ତମାନ ଜମ୍ମୁ କାଶ୍ମୀରରେ କାରଖାନା, ଘର କିମ୍ବା ଦୋକାନ ପାଇଁ ଜମି କିଣି ପାରିବେ।