ଯୁଦ୍ଧ ବନ୍ଦ କରିବା ପାଇଁ ରାଜି ନହେବାରୁ ଯୁକ୍ତରାଷ୍ଟ୍ର ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ଅଧସ୍ତନ ଅଧିକାରୀଙ୍କ ଜରିଆରେ ୟୁକ୍ରେନ ରାଷ୍ଟ୍ରପତି ବୋଲୋଡିମିର ଜେଲେନ୍ସ୍କିଙ୍କୁ ଅପମାନିତ କରି ହ୍ୱାଇଟ୍ ହାଉସ୍ରୁ ତଡ଼ି ଦେଇଛନ୍ତି । ରାଗ ତମତମ ହୋଇ ଟ୍ରମ୍ପ ତାଙ୍କ କର୍ମଚାରୀଙ୍କୁ ଡାକି ଜେଲେନ୍ସ୍କିଙ୍କ ପାଇଁ ଉଦ୍ଦିଷ୍ଟ ଚା’ ପାତ୍ର ହଟାଇ ନେବାକୁ ଆଦେଶ ଦେଇଥିଲେ । ଟ୍ରମ୍ପଙ୍କ ନିକଟରୁ ଏଭଳି ଆଚରଣ କଳ୍ପନା କରି ନଥିଲେ ଜେଲେନ୍ସ୍କି । ଗଭୀର ଚିନ୍ତାରେ ୟୁକ୍ରେନକୁ ଫେରିବା ଛଡ଼ା ତାଙ୍କ ନିକଟରେ ବିକଳ୍ପ କିଛି ନଥିଲା । ଶୁକ୍ରବାର ଦିନ ହ୍ୱାଇଟ୍ ହାଉସ୍ରେ ଟ୍ରମ୍ପ ଓ ଜେଲେନ୍ସ୍କିଙ୍କ ଆଲୋଚନା ବେଶ ଶାନ୍ତିପୂର୍ଣ୍ଣ ଥିଲା ।
ମାତ୍ର ହଠାତ୍ ଟମ୍ପଙ୍କ ସ୍ୱର ବଦଳି ଯାଇଥିଲା । ତାଙ୍କ କଥାଗୁଡ଼ିକ ଜେଲେନ୍ସ୍କିଙ୍କ ଶରୀରକୁ ବାଣ ପରି ବିଦ୍ଧ କରୁଥିଲା । ଟମ୍ପଙ୍କର ଗମ୍ଭୀର କଥାଗୁଡ଼ିକର ଜବାବ ବେଶ ଥଣ୍ଡା ମିଜାଜରେ ଦେଉଥିଲେ ଜେଲେନ୍ସ୍କି । ଦୁଇନେତାଙ୍କ ମିଳିତ ଆଲୋଚନାର କିଛି ଝଲକ ସୋସିଆଲ ମିଡିଆରେ ଭାଇରାଲ୍ ହୋଇଛି ଯାହାକୁ ଦେଖିବା ପରେ ସାରାବିଶ୍ୱ ଚକିତ ହୋଇଯାଇଛି । ରୁଷିଆ ଓ ୟୁକ୍ରେନ ମଧ୍ୟରେ ଶାନ୍ତି ପ୍ରତିଷ୍ଠା କରିବା ଅଭିପ୍ରାୟ ରଖି ଟ୍ରମ୍ପ ଜେଲେନ୍ସ୍କିଙ୍କୁ ହ୍ୱାଇଟ୍ ହାଉସ୍କୁ ଆମନ୍ତ୍ରଣ କରିଥିଲେ । ଜେଲେନ୍ସ୍କିଙ୍କ ସହିତ ଉଚ୍ଚବାଚ ସାରି ଟ୍ରମ୍ପ ତୁରନ୍ତ ସ୍ୱରାଷ୍ଟ୍ର ସଚିବ ମାର୍କୋ ରୁବିଓ, ଜାତୀୟ ସୁରକ୍ଷା ପରାମର୍ଶଦାତା ମାଇକ୍ ୱାଲଜ୍ଙ୍କ ସମେତ କିଛି ବରିଷ୍ଠ ଅଧିକାରୀଙ୍କ ସହିତ କିଛି ଗୋଟିଏ ଆଲୋଚନା କରୁଥିଲେ ।
ଟ୍ରମ୍ପଙ୍କ ପ୍ରସ୍ତାବକୁ ଗ୍ରହଣ କରିବା ପାଇଁ ରୋକଠୋକ୍ ମନା କରି ଦେଇଥିଲେ ଜେଲେନ୍ସ୍କି । ଏପରି ଅଭାବନୀୟ ଘଟଣା ଦେଖି ଜେଲେନ୍ସ୍କିଙ୍କ ସହିତ ହ୍ୱାଇଟ୍ ହାଉସ୍କୁ ଯାଇଥିବା ୟୁକ୍ରେନ ପ୍ରତିନିଧି ଦଳ ଛାନିଆ ହୋଇ ଯାଇଥିଲେ । ମଧ୍ୟାହ୍ନ ଭୋଜନ ପର୍ଯ୍ୟନ୍ତ ଅପେକ୍ଷା କରିବା ଅସମ୍ଭବ ଜାଣି ଜେଲେନ୍ସ୍କି ୟୁକ୍ରେନ୍ ଫେରି ଯାଇଛନ୍ତି । ଆନ୍ତର୍ଜାତିକ ରାଜନୀତିକୁ ଅତି ନିକଟରୁ ଦେଖି ଆସୁଥିବା କିଛି କୂଟନୀତିଜ୍ଞଙ୍କ ମତରେ ରୁଷିଆ ପ୍ରଥମେ ହମ୍ଲା କରିଥିବା ଦୃଷ୍ଟିରୁ ସେ ହିଁ ପ୍ରଥମେ ଯୁଦ୍ଧ ବନ୍ଦ କରିବା ଜରୁରୀ ।