ଭୁବନେଶ୍ୱର: ଗୁଜୁରାଟରୁ ଓଡିଶାରେ ୪୮ ହଜାର କୋଟି ଟଙ୍କାର ନିବେଶ ପ୍ରତିଶ୍ରୁତି ମିଳିଛି। ପ୍ରକଳ୍ପ ହେଲେ ସୃଷ୍ଟି ହେବ ପାୟ ୬୮ ହଜାର ନିଯୁକ୍ତି। ପ୍ରକଳ୍ପ ନହେଲେ ୬୮ ହଜାର ନିଯୁକ୍ତି ଧୂଅାଁବାଣ। ଗୁଜୁରାଟରେ ନିବେଶକଙ୍କ ସମ୍ମିଳନୀରେ ୪୮,୩୩୦ କୋଟି ଟଙ୍କାର ନିବେଶ ପ୍ରତିଶ୍ରୁତି ନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓଡିଶା ଫେରିଛନ୍ତି। ଜାଣି ରଖନ୍ତୁ, ପ୍ରତିଶ୍ରୁତି ସର୍ବଦା ଅନିଶ୍ଚିତ।
ଭାରତର ଶିଳ୍ପ ଅଭିବୃଦ୍ଧିର ନେତୃତ୍ୱ ପୂର୍ବରୁ ପଶ୍ଚିମ ଭାରତ ନେଇସାରିଛି। ବର୍ତମାନ ବିକଶିତ ଭାରତ ପାଇଁ ପୂର୍ବ ଭାରତକୁ ପଦକ୍ଷେପ ନେବାକୁ ପଡିବ।
ଓଡିଶା ସେହି ପରିବର୍ତନର ନେତୃତ୍ୱ ନେବାକୁ ପ୍ରସ୍ତୁତ। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗୁଜରାଟର ଭଦୋଦରାରେ ଓଡ଼ିଶା ନିବେଶକଙ୍କ ସମ୍ମିଳନୀ ରୋଡ ସୋ’ରେ ଉଦବୋଧନ ଦେଇ ଏହା କହିଛନ୍ତି। ପୂର୍ବୋଦୟର ଦୃଷ୍ଟିକୋଣ ଅନୁଯାୟୀ ଓଡ଼ିଶାକୁ ପୂର୍ବ ଭାରତର ଅଭିବୃଦ୍ଧି ଇଞ୍ଜିନ ଭାବରେ ସ୍ଥାନିତ କରି ମୁଖ୍ୟମନ୍ତ୍ରୀ ଗୁଜରାଟର ପ୍ରମୁଖ ଶିଳ୍ପଗୁଡ଼ିକୁ ଓଡ଼ିଶାରେ ନିବେଶ କରିବାକୁ ଆମନ୍ତ୍ରଣ କରିଥିଲେ। ଓଡ଼ିଶାକୁ ଭାରତର ଦ୍ରୁତତମ ବର୍ଦ୍ଧିତ ବାଣିଜ୍ୟ କରିଡରର ପ୍ରବେଶ ପଥ ବୋଲି ଅଭିହିତ କରି ସେ ପାରାଦୀପ, ଧାମରା ଏବଂ ଗୋପାଳପୁର ପ୍ରମୁଖ ବନ୍ଦର ମାଧ୍ୟମରେ ପୂର୍ବ ଏସିଆ, ଦକ୍ଷିଣ-ପୂର୍ବ ଏସିଆ ଏବଂ ଇଣ୍ଡୋ-ପ୍ରଶାନ୍ତ ମହାସାଗରୀୟ ବଜାର ସହିତ ଶିଳ୍ପଗୁଡ଼ିକୁ ସଂଯୋଗ କରିବାରେ ରାଜ୍ୟର ରଣନୈତିକ ସୁବିଧା ଉପରେ ଆଲୋକପାତ କରିଥିଲେ। ଓଡ଼ିଶାର ଶିଳ୍ପ ଇକୋସିଷ୍ଟମ ଉପରେ ଆଲୋକପାତ କରି ମୁଖ୍ୟମନ୍ତ୍ରୀ କହିଛନ୍ତି ଯେ ରାଜ୍ୟ କଂଚାମାଲ ଉପଲବ୍ଧତା, ଆଧୁନିକ ଭିତିଭୂମି, ବନ୍ଦର-ନେତୃତ୍ୱାଧୀନ ଲଜିଷ୍ଟିକ୍ସ, ନୀତି ସ୍ଥିରତା ଏବଂ ଦ୍ରୁତ ପ୍ରକଳ୍ପ କାର୍ଯ୍ୟାନ୍ୱୟନ ବ୍ୟବସ୍ଥାର ଏକ ଦୃଢ଼ ମିଶ୍ରଣ ପ୍ରଦାନ କରେ।
ଓଡ଼ିଶା ଏକ ସମ୍ବଳ-ଭିତିକ ଅର୍ଥନୀତିରୁ ଏକ ମୂଲ୍ୟଯୁକ୍ତ ଉତ୍ପାଦନ ଏବଂ ଉନ୍ନତ ଶିଳ୍ପ ହବ୍ରେ ସ୍ଥିର ଭାବରେ ପରିବର୍ତନ ହେଉଛି ବୋଲି କହିଥିଲେ। ନିବେଶକଙ୍କ ସୁବିଧା ଉପରେ ସରକାରଙ୍କ ଧ୍ୟାନକୁ ଦୋହରାଇ ମୁଖ୍ୟମନ୍ତ୍ରୀ ଓଡ଼ିଶାର ସିଙ୍ଗଲ୍-ୱିଣ୍ଡୋ କ୍ଲିୟରାନ୍ସ ମେକାନିଜିମ୍ ଏବଂ ହ୍ୟାଣ୍ଡହୋଲ୍ଡିଂ ସପୋର୍ଟ ସିଷ୍ଟମ୍ ମାଧ୍ୟମରେ ଶିଳ୍ପଗୁଡ଼ିକୁ ସକ୍ରିୟ ସମର୍ଥନ ପ୍ରଦାନ କରିବାର ଆଶ୍ୱାସନା ଦେଇଛନ୍ତି। ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ କହିଥିଲେ ଯେ ପୂର୍ବୋଦୟର ଦୃଷ୍ଟିକୋଣ ଅନୁଯାୟୀ ଓଡ଼ିଶା ପୂର୍ବ ଭାରତ ପାଇଁ ଏକ ପ୍ରାକୃତିକ ଶିଳ୍ପ ସମ୍ପ୍ରସାରଣ କେନ୍ଦ୍ର ଭାବେ ଉଭା ହେଉଛି। ୨୦୩୬ ସୁଦ୍ଧା ସମୃଦ୍ଧ ଓଡ଼ିଶା ନିର୍ମାଣ ପାଇଁ ରାଜ୍ୟର ଦୃଢ଼ ଭିତିଭୂମି, ବନ୍ଦର-ନେତୃତ୍ୱାଧୀନ ଲଜିଷ୍ଟିକ୍ସ, ସ୍ଥିର ଶିଳ୍ପ ନୀତି, ଦକ୍ଷ କର୍ମଚାରୀ ଏବଂ ସ୍ପଷ୍ଟ ରୋଡମ୍ୟାପ୍ ଉପରେ ଆଲୋକପାତ କରିଥିଲେ। ଏହି ନିବେଶକ ସମ୍ମିଳନୀରେ ମୁଖ୍ୟ ସଚିବ ଅନୁ ଗର୍ଗ, ଅତିରିକ୍ତ ମୁଖ୍ୟ ସଚିବ ଶିଳ୍ପ, ଗୃହ ହେମନ୍ତ ଶର୍ମା ଉପସ୍ଥିତ ଥିଲେ। ଅହମ୍ମଦାବାଦ, ମୁନ୍ଦ୍ରା ଏବଂ ଭଦୋଦରାରେ ଅନୁଷ୍ଠିତ ଓଡ଼ିଶା ନିବେଶକଙ୍କ ସମ୍ମିଳନୀରେ ୧୩୨ରୁ ଅଧିକ ବୈଠକ ଅନୁଷ୍ଠିତ ହୋଇଥିଲା। ଯେଉଁଥିରେ ୪ଟି ରାଉଣ୍ଡ ଟେବୁଲ ବୈଠକ ହୋଇଥିଲା। ଅହମ୍ମଦାବାଦ ଏବଂ ଭଦୋଦରାରେ ୨ଟି ନିବେଶ ପ୍ରୋତ୍ସାହନ ରୋଡ ସୋ’ ହୋଇଥିଲା। ଭଦୋଦରାରେ ଅନୁଷ୍ଠିତ ଓଡ଼ିଶା ନିବେଶକଙ୍କ ସାକ୍ଷାତ ରୋଡ ସୋ’ରେ ୨୦୦ରୁ ଅଧିକ ଶିଳ୍ପପତି, ବ୍ୟବସାୟିକ ସଂଗଠନ ଏବଂ ଆନୁଷ୍ଠାନିକ ଅଂଶୀଦାରମାନେ ଅଂଶଗ୍ରହଣ କରିଥିଲେ। ଏଥିରେ ଗୁଜରାଟରୁ ଓଡ଼ିଶାକୁ ୪୮,୩୩୦ କୋଟି ନିବେଶ ସମ୍ଭାବନା ମିଳିଛି। ଏହି ସବୁ ପ୍ରକଳ୍ପ ହେଲେ ୬୭,୮୩୮ରୁ ଅଧିକ ନିଯୁକ୍ତି ସୃଷ୍ଟି ସୁଯୋଗ ମିଳିବ।