ପୁରୀ: ସନ୍ଧ୍ୟା ପ୍ରାୟ ୫ଟା ହେବ । ପୁରୀ ଜଗନ୍ନାଥ ମନ୍ଦିର ସାମ୍ନାରେ ଠିଆ ହୋଇଛି । କାନରେ ପଡୁଛିି ସମୁଦ୍ର ଢେଉ ଶବଦ । ବହିଯାଉଛି ମନ୍ଦ ମନ୍ଦ ମଳୟ । ମନ୍ଦିର ଭିତର ବାହାରେ ହଜାର ହଜାର ଭକ୍ତ । ସମସ୍ତଙ୍କ ଆଖି ଉପରକୁ । ଭାବିଲି ସମସ୍ତେ ଉପରକୁ ଅନାଇଛନ୍ତି କ’ଣ ପାଇଁ?
ସେହି ସମୟରେ ଧୋତି ଦୁଇଜଣ ଯୁବକଙ୍କୁ ଦେଖିବାକୁ ପାଇଲି । ଦୁହିଁଙ୍କ ପିଠିରେ ଅଲଗା ଅଲଗା ପ୍ରକାରର ପତାକା ବନ୍ଧା ଯାଇଛି । ସେମାନେ ମନ୍ଦିର କାନ୍ଥ ଆଡ଼କୁ ପିଠି କରି ଛିଡ଼ା ହୋଇଛନ୍ତି । ହଠାତ୍ ଲୋକଙ୍କ ମୁହଁରେ ‘ଜୟ ଜଗନ୍ନାଥ’ ଶୁଣାଗଲା ।
କାଳବିଳମ୍ବ ନକରି ମୋ ପାଟିରୁ ବି ବାହାରିଗଲା ‘ଜୟ ଜଗନ୍ନାଥ’ । ବାୟୁମଣ୍ଡଳରେ ଗୁଞ୍ଜରି ଉଠିଲା ଜୟ ଜଗନ୍ନାଥ । ମୁଁ କିଛି ବୁଝିବା ଆଗରୁ ଦୁଇ ଯୁବକ ସେମିତି ଆମରି ଆଡ଼କୁ ମୁହଁ କରି ଦ୍ରୁତଗତିରେ ମନ୍ଦିର ଉପରକୁ ଚଢ଼ିବାକୁ ଲାଗିଲେ । ମାତ୍ର କେଇ ମିନିଟ୍ ଭିତରେ ଦୁହେଁ ଉପର ଗୁବନ୍ଦ ନିକଟରେ ପହଂଚିଗଲେ । ତା’ପରେ ବୁଲିଗଲେ ମନ୍ଦିର ଆଡ଼କୁ । ହାତ ସାହାଯ୍ୟରେ ଉପରକୁ ଚଢ଼ିଗଲେ । କିଛି ମିନିଟ୍ ଭିତରେ ମନ୍ଦିର ଚୂଡ଼ାରେ ପହଂଚିଲେ ।
ମୋ ଦେହ ଶିହରି ଉଠୁଥାଏ । ଛାତି ଧଡ଼ଧଡ଼ ହେଉଛି । ଦୁହିଁଙ୍କ ଭିତରୁ କାହାର ଗୋଡ଼ ଖସିଗଲେ କ’ଣ ହେବ? ପ୍ରଥମ ଥର ପାଇଁ ସେଭଳି ଦୃଶ୍ୟ ଦେଖିଲି । ଲାଗିଲା ଆଖି ଆଗରେ କୌଣସି ଆନିମେଟେଡ୍ ଚଳଚ୍ଚିତ୍ରର ଦୃଶ୍ୟ ଦେଖୁଛି ।
ଦୁଇ ଯୁବକ ପ୍ରଥମେ ପୁରୁଣା ପତାକା ଖୋଲିବାକୁ ଲାଗିଲେ । ନୂଆ ପତାକା ଲଗାଇଲେ । ତା’ପରେ ମଶାଲ ଜଳାଇ ହଲାଇଲେ । ତଳେ ଠିଆ ହୋଇଥିବା ଉକ୍ତ ମଶାଲ ନିଆଁରୁ ଆରତୀ ନେଲେ ।
ଜଣକୁ ପଚାରି ବୁଝିଲି, ପ୍ରତିଦିନ ମନ୍ଦିରର ପତାକା ବଦଳାଯାଏ । ଖରା, ବର୍ଷା ଅବା କଠିନ ଜାଡ଼ ପଡ଼ିଲେ ମଧ୍ୟ କୌଣସି ପରିସ୍ଥିତିରେ ମନ୍ଦିରର ପତାକା ବଦଳା କାମ ବନ୍ଦ ହୁଏନା । ମାନ୍ୟତା ଅଛି, ଯଦି ଗୋଟିଏ ଦିନ ପତାକା ବଦଳା ନଯାଏ, ତେବେ ୧୮ ବର୍ଷ ପାଇଁ ମନ୍ଦିର ବନ୍ଦ ହୋଇଯିବ ।