ଖଲ୍ଲିକୋଟ : ଗଞ୍ଜାମ ଜିଲ୍ଲା ଛତ୍ରପୁର ବ୍ଲକ ପୋଟଲାମପୁର ଚାଷୀଙ୍କ ରାସ୍ତା ଅବରୋଧ । ଜିଲ୍ଲାର ବିଭିନ୍ନ ସ୍ଥାନରେ ଚାଷୀମାନେ ନିଜର ଉତ୍ପାଦିତ ଧାନ ଶସ୍ୟକୁ ମଣ୍ଡିରେ ପକାଇ ରଖିଛନ୍ତି । ମଣ୍ଡିରୁ ଉଠୁନି ଚାଷୀଙ୍କ ଧାନ, ଟୋକନ ରଦ୍ଦ ଆଶଙ୍କା । ଏପରି ବିଭିନ୍ନ ସମସ୍ୟାର ସମାଧାନ ଦାବି ନେଇ ରାଜରାସ୍ତାରେ ଚାଷୀ ।
ଖବର ଅନୁଯାୟୀ, ଜିଲ୍ଲାର ବିଭିନ୍ନ ମଣ୍ଡିରୁ ଧାନ ଉଠାଣରେ ବିଳମ୍ବ ଲାଗି ଟୋକନ ରଦ୍ଦ ହେବାର ଆଶଙ୍କା ରହିଛି । ୪୦୦ ଟୋକନ ମଧ୍ୟରୁ ୩୭ଟି ଟୋକନରେ ୧୪୬୧ କ୍ୱିଣ୍ଟାଲ ଧାନ କିଣାଯାଇଛି । ପୋଟଲାମପୁର ମୁଖ୍ୟ ରାସ୍ତାରେ ଧାନ ବସ୍ତା ରଖି ଚାଷୀମାନେ ବିକ୍ଷୋଭ କରିଛନ୍ତି । ଛତ୍ରପୁର-ତାରାତାରିଣୀ ମୁଖ୍ୟ ରାସ୍ତା ଅବରୋଧ ଫଳରେ ଯାତାୟତରେ ବାଧା ସୃଷ୍ଟି ହୋଇଛି । ଏହାସହ ଗାଁରୁ ଛାତ୍ରପୁର ଓ ବ୍ରହ୍ମପୁରକୁ ଯାଉଥିବା ୨ଟି ପାଣି ପ୍ରକଳ୍ପକୁ ବନ୍ଦ କରିଥିବାରୁ ପାଣି ଯୋଗାଣରେ ବାଧା ସୃଷ୍ଟି ହୋଇଛି । ଚାଷୀମାନେ ଏନେଇ ଜିଲ୍ଲା ପ୍ରଶାସନକୁ ଭେଟି ଅଭିଯୋଗ କରିଥିଲେ ବି କୌଣସି ସମାଧାନ ହୋଇନଥିଲା । ଶେଷରେ ବାଧ୍ୟ ହୋଇ ଆନ୍ଦୋଳନକୁ ଓହ୍ଲାଇଛି ଚାଷୀ ।